Nongstoiñ, Naiwieng 30: Kum ka jingїasnohkti bad ban їadon bynta lang bad ki para briew kiba donkam їa ka jingїarap, ka synjuk jong ki samla jong ka thaiñ Nongstoiñ kaba la tip kum ‘Ka Kynhun Iarap Ia Kiba Donkam Eh’ ba la їalam da u bah Lumlang Kharsyiemlieh bad u bah S.Marbañiang, mynta ka sngi balang ka 30 tarik Naiwieng, ka la leit ban jngoh їa ka Rev S Wollington Children’s Home, ka jaka ri khunswet kaba la pynїaid da ka Khasi Jaintia Presbyterian Synod Sepngi, kaba don ha ka shnong Nongpyndeng.
Katei ka synjuk ka la noh synñiang ruh da ki jaiñ siang thiah bad ki syngkhlieh na ka bynta ki 26 ngut ki khynnah kiba don ha katei ka Children’s Home.
Shuwa ban ai їa kitei ki jingai sngewbha, la їoh їa ka jingkren lyngkot na u bah Lumlang Kharsyiemlieh, ha kaba u la pynshai ba ka thong ba ka synjuk ka la buh kum ka Motto ka long “To hikai їa ka ban leh bha”, kaba la pynshong nongrim na ka Bible kaba la thoh ha ka Kitab u Isaiah Lynnong 1 dkhot 17. La їoh ruh їa ka jingduwai na uwei na ki dkhot jong ka Synjuk uba dei na ka Jingїaseng Samla Nongkhlaw District.
U bah Kharsyiemlieh haba ai jingkren ha katei ka sngi u la kyntu їa ki 26 ngut ki khynnah shynrang bad kynthei kiba sah ha katei ka jaka sumar, ba ki dei ban kynmaw ba kine ki sngi ki dei ki sngi kiba eh bad kiba jynjar haduh katta katta, namar ki bor jong kane ka pyrthei ki їaleh ban pynngop ha kiba bun jait ki jingsniew.
U la ong ruh ba ki khynnah kiba dang khie samla ki dei ban long ki jingshai їa kiwei pat da kaba pynkynmaw їa ki dkhot na ka Bible kaba ong, “Phi phi long ka jingshai ka pyrthei ym lah ban buh rieh їa ka shnong kaba la buh halor u lum, lymne kim ju thang thang їa ka sharak bad buh hapoh ka shang hynrei ha ka dieng pynїeng sharak”.
U la kyntu ruh ba ki dei ban kohnguh їa ki nongpynїaid, namar ki nongpynїaid jong katei ka jaka sumar kim don jingїapher ei ei na ki kmie ki kpa bad ki lah ban kham sbun ruh, namar haba ki don ha katei ka jaka ki їoh lut їa ki jinghikai naduh ka rwai ka siaw ka tem ka put, ka jingduwai bad ka jingїaieit mar kylliang iwei їa iwei pat.
Na ka liang ka kong Suklinshisha Paliar kaba dei ka Superintendent jong katei ka children home, ka la pynsngew ba ki khynnah kiba sah ha katei ka jaka sumar ki don 15 ngut ki shynrang bad 11 ngut ki kynthei. Hynrei ki sah ha la ka jong ka jong ka jaka sah. Nalor nangta ka la pynsngew ruh ba baroh 26 ngut kiba leit skul bad ki don naduh klass III haduh ka klass kaba 11.
Khatduh eh na ka liang ka KKIIKDE, ka la aiti їa kitei ki jingai sngewbha sha ka Superintendent ba kan peit kumno ban pyndonkam їa ki.
