Shillong, Rymphang 13: U Symbud Myntri Rangbah ba khmih ia ka tnad kam pohiing Bah Prestone Tynsong, ula khein ia ka jingthoh ka HNLC ha Facebook kum ka ‘drama’ haba pynpaw ia ka jinglong ba kloi ka Sorkar ban iakynduh ia ki Nongialam wat shabar ka Jylla Meghalaya.
“Namar kata ngi dang khot beit ia ki (HNLC) na ka bynta ka Sorkar Jylla ba kin sngewbha ban nym pynsangeh noh ia ka jingiakren iasuk” ong u Bah Prestone haba iakren bad ki nongthoh khubor.
Ula ong “Sa shisien, nga kyrpad ban pynsdang biang ia ka jingiakren, ka jingkhang ka plie beit. Pyrkhat biang ia kane, sngewbha long rangbah bad pyrkhat ia la lawei”.
Haba niew ia ka FB post kum ka drama ka HNLC, u Bah Prestone ula ong “Kumba nga la dep pynshai, ngan pynshai biang ba lada phi (HNLC) tieng- namar ki pynpaw ba ki nongialam ba hakhmat kynthup u Chairman lane Commander-in-Chief ki lah ban nym wan namar ka jingtieng ioh shah kem, kane ruh ngi la dep ai ka jingkular ba ngin ai ka lynti iaid kaba shngain bad lada phi kwah ban iakren ha ka jaka ba shabar ka Meghalaya, ia kane ruh ngi kloi, ngi ong ba kin tyrwa hi ma ki ia ka jaka”.
“Hynrei haba nga ong ia kane, kam dei pat ia ki ban thoh ha ki social media ba ngi khot sngewbha ia u Bah Prestone sha ka jingiakren namar kane kam long official ne ba ithuh. Kaba ithuh hi da ka Sorkar ka long, ym dei u Bah Prestone, uba khot ia ki. Ka dei ka Sorkar India bad ka Sorkr Jylla kaba khot ia ka jingiakren bad ka HNLC” ula bynrap.
U Bah Prestone ula pynthikna ba kam shym la don kano kano ka jingiohpdiang ia ka shithi na ka HNLC haba iadei bad ka rai jong ka halor ka jingkyrpad ka Sorkar ban pynbteng biang ia ka jingiakren.
“Ngam don eiei ban ong. Ngam lah ban kren n aka bynta jong ki hynrei na ka liang ka Sorkar hi, ka jingkhang ka dang plie. Ngi iai kyrpad ia ki ba kin pynbteng ia ka jingiakren” ula ong.
