Guwahati, Risaw 10: U Myntri kam pohiing ka sorkar pdeng u Amit Shah ha ka sngi Saitjain ba la lah ula ong ba na ka liang ka sorkar kala pyrshang ban pynkhlain ia ki kam shong shngain khnang ba yn ym donkam ban pyntreikam ia ka ain Armed Forces Special Powers Act (AFSPA) hapoh ka thain.
U Shah ula ong ruh ba ia ka AFSPA la dep lypa ban weng na 80 percent ki jaka hapoh ka thain Northeast.
Haba kren halor ka phang kaba iadei bad ka jinglong jingman na ka jingshlei um ha ka jylla, u Amit Shah haba kren ha ka rally paidbah ula ong, “Ai biang ia ngi sa san snem, ngin weng ia baroh ki jingeh na ki jingshlei um.”
Haba kynthoh pyrshah ia ka party synshar ba la rim, u Amit Shah ula ong; “Ka Congress kala pynlong ia kane ka thain Northeast kaba itynnad ka jaka jong ki kam iaumsnam, ka thain kaba jur tang ki jingiakynad bad ki kam ialeh pyrshah.U PM Modi ula lah ban wanrah pat ha kawei ka lynti jong ka jingsuk bad ka roi ka par.”
“Hadien bala mad ia shibun ki jingeh, ka BJP lyngba ka jinglen lade bad ka jingtrei borbah kala sei ia u soh ha ka jingroi hapoh ka thain Northeast.Mynta, une u symbai ula kylla long u diengbah hapoh ka jingialam jong u PM Modi,” ong shuh shuh u Myntri ka sorkar pdeng u Amit Shah
