Shillong Risaw 20: U Myntri Kam Pohiing ka jylla ma Lahkmen Rymbui hynne ka sngi, ula pyntip ba ka sorkar kan sa pyntreikam pura ia ki jingbthah jong ka iingkashari ban tehlakam ia ki kam tih bad khaii be-aiñ ia u dewiong ha ka jylla.
Ha kaba iadei bad ka jingbthah ka iingkashari ba lada ioh kurup tang ia kawei ka trok kaba khaii be-aiñ ia u dewiong kumta kan leh da kaba tyngeh ia ki Superintendent of Police (SP), u Bah Rymbui u la ban biang ba ka sorkar jylla kan pyntreikam pura ia ki jingbthah jong ka iingkashari.
Halor ka jingkynnoh u MLA ka BJP u Bah AL Hek ba ka jingkhaii be-ain ia u dewiong kadei kaba la pyniaid da ka kynhun ‘High Level’, u ma Lahkmen u la ong, “Ngi la dep ban pynmih iaka hukum man la ka por halor ka jingpyrkhing bad kala don ka jingkem ia ki trok bad ka jingkurup ia u dewiong man la ka por hynrei ban ong ba ka long kumtei, nga tharai kam long kaba iahap hynrei ngi don hangne ban peit ba ngi dei ban bud ryntih ia ka aiñ bad lada ki don kino kino ki jingduna dei ban pynbeit noh ia ki khnang ban pynsangeh shi syndon ia ki kam be-aiñ”.
Halor ka jingkynnoh u Bah Hek ba ka sorkar kala pulom ha kaban tehlakam iaka jingkhaii be-aiñ ia u dewiong, u Myntri Kam Pohiing ula ong, “Ngan ym pynshai iaka jingkynnoh jongno re jongno, hynrei ngan pynshai katkum ki jingjia kiba shisha”.
