Nongpoh, Iaiong 11 : Ki san tylli ki Dorbar Shnong ka thain Umiam, ha ka sngi Saitjain kila pynshai ba kim pat ai satia ia ka jingkyrshan ba pura ban pyntrei ia ka project Taj Umiam Resort & Spa ha Umiam kumba la kam da u Deputy Commissioner ka Ri-Bhoi District.
Kane ka jingpynsai kala mih halor ka jingkam u Deputy Commissioner Abhilash Baranwal ba ki san tylli ki Dorbar Shnong ki ai ka jingkyrshan ia ka project namar ba kam don jingktah ia ka dewlynnong Lumpongdeng.
Kine ki Rangbah ki dei ka Mawlyndep, Umniuh, Umiam, Umbir bad Umsaw.
Ki Nongialam Shnong ba kynthup ia u Rangbah Shnong ka Mawlyndep Bah Jinu Kharbuh, Rangbah Shnong ka Umiam Bah Steven Kharkrang, Rangbah Shnong ka Umniuh Bah William Lyngdoh bad Rangbah Shnong Umbir Bah PJ Kurbah, kila pynpaw ba ia mynta hi kam pat don ka jingiakren ban kyrshan ia ka project halor ka nongrim ba kim pat iohi satia ia kino kino ki kot ki sla kiba biang kum ka Detailed Project Report jong ka project.
“Hooid ngim pyrshah ia ka jingwan ki kam pynroi ha ka thain jong ngi, hynrei kim pat tip shai pat shaphang ka project…kumta kim pat nang ban rai la kin kyrshan ne pyrshah” kila ong.
Halor ka jingiakhih ka Green Tech Foundation¸ kine ki Dorbar Shnong kila pynpaw ba kim pat don kano kano ka jingtip ia kane lait noh tang ka jingiohi ha ki lad pathai khubor.
Kila pynpaw ruh ba haduh mynta ki nongialam ka Foundaton kim pat wan iakynduh ne iasyllok eiei bad ki Dorbar Shnong haba iadei bad ka jingpyrshah jong ki ia kane ka project.
