Mih ka jingdawa ban wanrah noh da ka 132/33 Kv Power Sub Station
Nongpoh, Nailar 02: Ka sor Nongpoh kala sawa jam daka sur bynniaw jong ki paidbah ba ong “Ngi ju pep ban siew thikna ia ka bai bording sha ka MeECL hynrei balei ngim ioh pat ia ka bording ba thikna”.
Kane ka sur jong ki khynnah pule kala mih na ka rally jong ka Khasi Students Union-Nongpoh Circle ba long hynne ka sngi Balang ha Nongpoh, ban pynpaw ia ka jingpyrshah halor ka jingbym lah jongka MeECL ban pynbiang ia ka bording elektrik ha ka thain, kaba lapmiet ban lip khlem por khlem samoi.
Ha kane ka rally la wan iashimbynta ruh da ki Nongialam ka KSU-North Khasi Hills bala ialam da u President samla Ferdinald Kharkamni, ki Nongialam ka FKJGP, RBYF bad HNYF nalor ki Khynnah skul, ki riew rangbah bad ki kynhun bapher bapher kiba dei ki nongshongshnong jong ka thain Nongpoh, Headquarter ka Ri-Bhoi District.
Ka jingpynrem kaba jur kala mih na ki nongiaid rally pyrshah ia ka tnad MeECL, kiba la pyrta shla ia ka jingbitar halor ka jingleh bym suidniew jong kane ka tnad ban peit ia ki jingeh u paidbah uba ap ia ka bording ban pyndep iala ki kam ki jam la ha Iing ka sem ne ha ka trei ka ktah.
“Ngi ju pep ban siew thikna ia ka bai bording sha ka MeECL hynrei balei ngim ioh pat ia ka bording ba thikna. Lada ngi pynslem ban siew ia ka bai bording, ka MeECL kala dain kuna ne poi ruh sha ka jingbyrngem ban ot bording hynrei haba ngi siew thikna pat, balei kam lah ban ai ia ka bording khlem kano kano ka jingthut” buh jingkylli ki nongiaid rally.
Ha kane ka jingiaid rally, ka KSU-Nongpoh Circle kala leit ruh ban ai ia ka dorkhas ha u SDO ka MeECL bad u Additional Deputy Commissioner ka Ri-Bhoi, ba dawa ban pynurlong noh ia ka jingdawa ban wanrah ia ka 132/133 KV Power Sub Station ha Nongpoh ban lah pynbiang ia ka jingsam bording.
Haba iakren bad ki nongialam Sengbhalang bad ki riew pawkhmat, kila thalain tyngeh ia ka MeECL ba ka sngap mynthi ia ka jingud jingnam jong u paidbah ka thain Nongpoh kaba la slem bha bad ong “Ka MeECL I kumba kam ju ioh bai bording na ngi. Na kaei kaba ngi iohi, kane ka Tnad kam i patiaw ia ngi ki paidbah hynrei ka shimkhia ban pynbiang bording tang sha ki karkhana bapher bapher kiba don ha ka District watla bun ki dei kibym ju siew bai bording kumba la paw ha ki kaiphod bapher bapher. Imat ka don kaei re kaei sha lyndet?.
U Ferdynald K Kharkamni, President ka KSU, North Khasi Hills District, u la kdew, ba ka seng lem bad kiwei ki kynhun sengbhalang hapoh ka Coordination Committee, la 2 sien kynthih ki la iai dawa na ka sorkar jylla ban pynioh noh ia ka 132/33 Kv Power Substation hapoh ka sor Nongpoh ban pynsuk ia ka tnat MeECL ban lah noh ha ka ban pynbiang ia ka jingsam bording hapoh kane ka thain bad kiwei kiwei ki jaka ba marjan bad kan nym don shuh kano kano ka jingthut ha ka jingsam bording.
“Baroh ki sor bah jong ki district hapoh ka jylla Meghalaya ki la ioh ia ka 132/33 Kv Power Substation kiba la ioh ruh ia ka jingshakri kaba paka ha ka liang ka jingsam bording, katba ha Ri Bhoi district ka district kaba la kham rim, kam shem la ioh ia kane ka power substation bad kane ka dei ka daw halor ka jingsynjor jong ka jingsam bording”, ong u Bah Kharkamni, da kaba bynrap ruh, ba haduh mynta ka Nongpoh Sub Station ka ai jingshakri ia ki paidbah lyngba ka 33/11 Kv.
U la iathuh ruh, ba hapoh ka thain Nongpoh ki la don bun tylli ki don shibun tylli ki 132 Kv tower lain kiba iaid lyngba kane ka thain, kumta lada ka tnat MeECL lyngba ka sorkar jylla kan lah ban pyntreikam noh ia ka Power Substation kan nym don kano kano ka jingeh namar ka lain ka la don lypa bad kane kan lah ban weng syndon ia ka jingeh kaba la don mynta la palat phew snem ha kane ka district.
U la iathuh ruh, ba shen ka seng kan sa leit ban ia kynduh biang ia ki bor ba halor khamtam ia u Myntri Rangbah ka jylla ban pynbor ia ka sorkar jylla ba kan pynurlong noh ia kane ka jingdawa u paidbah ban wanrah ia ka 132/33 Kv Power Substation ha Nongpoh.
