Shillong Lber 23: U National President ka National Peoples Party (NPP) u Conrad K Sangma ula ong, ba kala don ka jingiasngewthuh jingmut kaba skhem hapdeng ki seng kiba iatreilang hapoh ka kynhun National Democratic Alliance (NDA) ban kyrshan ia ki kyrtong ka NDA ha ka elekshon MP Lok Sabha.
“Kala don ka jingiasngewthuh jingmut kaba skhem hapdeng ki paralok kiba don lang ha ka Sorkar Pdeng ban ia kyrshan ia ki kyrtong ka NDA ha kylleng ki Constituency bad ka ai nuksa ba u kyrtong ka NDA ha Nagaland udei na ka seng NDPP. Kala don ka jingiaid kaba khlaiñ ban sei ia u kyrtong monlang ban kyrshan ia u kyrtong jong ka NDA bad ha ka jylla Meghalaya kan dei ka seng NPP, ha Nagaland ka NDPP bad ha ka Outer Manipur ka NPF bad ha Manipur ka BJP” ong u Conrad K Sangma haba iakren bad ki nongthoh khubor hynne ka sngi Saitjaiñ.
“Ha ka lah sngi u Blei ngan leit sha Nagaland ban leit iakynduh ia u Myntri Rangbah ka Nagaland, ha kaba yn leit lang ryngkat ki nongialam ka seng bad ki MLA ban iakren halor katei ka mat. Kumba long mynta, u James PK Sangma u don hapoh Arunachal Pradesh ban iakren halor katei ka kam kaba iadei bad ka elekshon MP. Nga la iakynduh ruh ia ki nongialm na ka jylla Manipur kiba la wan sha ka nongbah Shillong ban iakren halor ka kam elekshon ban pynthikna ban ai jingkyrshan ia ki kyrtong ka NDA” ong u National President ka NPP.
Ula ong, ha ka jylla ba don ka BJP bad ki jaka kiba khlain ka NDPP ne ka don ia ki nongmihkhmat ki jongki kumta kin kyrshan ia u kyrtong ka NDA.
Ha kaba iadei bad ka MP Elekshon Lok Sabha ha Shillong bad Tura khamtam haba ka BJP kala rai ban ai jingkyrshan ia ka NPP, u Conrad ula ong “Ngam ju ngeit ba ngi la don lypa ha kyrdan kaba biang bad ngam kwah ban pyrkhat kumtei ne ban long kiba la skhem jingmut shaba palat ha ka elekshon. Nga ju ong, ia katei ha man la ki elekshon bad ngam ju kheiñ sting namar man la ka elekshon kadei ka elekshon kaba don ia ka jingiakhun, ngi hap ban trei shitom ha Tura bad ngim lah ban khein sting noh bad ngin ym kheiñ sting hi ruh”.
Ha kaba iadei bad ka Shillong Constituency, u Conrad ula ong, “Ngi la trei shitom bha hangne bad ngi ai khublei ia baroh ki seng saiñ pyrthei kiba ai ia ka jingkyrshan ia ngi, la kadei ba ngi ioh ia ka jingkyrshan mynta na ka BJP ne ka jingai jingkyrshan ka TMC ha Nongthymmai Constituency bad shabar jong ka Nongthymmai Constituency ruh. Ngi la ioh ia ka jingkyrshan na kylleng hynrei ngi dang treikam shuh shuh ban don ka jingiadei bad ki paidbah bad ban ialap elekshon na ka bynta ka kyrtong bad kane kan dang iaid shakhmat bad ngin ap khmih lynti beit ia kaba bha”.
Ula ong, ka jingwan ai jingkyrshan jong kino kino ki riewshimet ne kino kino ka seng ka long kaba bha bad kan long ka jingmyntoi ia ka NPP ha kane ka elekshon kaba mynta.
 u Conrad K Sangma ula ong, ba kala don ka jingiasngewthuh jingmut kaba skhem hapdeng ki seng kiba iatreilang hapoh ka kynhun National Democratic Alliance (NDA) ban kyrshan ia ki kyrtong ka NDA ha ka elekshon MP Lok Sabha.){kind=link}