Shillong, Jylliew 15: U MLA bala jop haduh san samoi lynter na Pynthorumkhrah Constituency Bah A.L.Hek ula pynpaw ia ka jingngeit shem ba un wanphai biang kum u Nongmihkhmat jong kane ka Constitunecy sha ka Iingdorbar Thaw Aiñ ka Jylla ha ka elekshon 2023.
U Bah Hek ula pynskhem ruh ialade ba un mih ban aireng ha kane ka elekshon kum u kyrtong ka Bharatiya Janata Party (BJP) haba kam ba bun ki seng saiñ pyrthei kila wan khroh ia u ban ai ticket.
U Bah Hek uba la shah weng na ka Sorkar MDA ba ialam u Conrad Kongkal Sangma, ula pynkut ruh ia baroh ki jingmutdur ba u don ka jingthmu ban leit pyniasoh ialade sha ka All India Trinamool Congress (AITC) bad ong “Kaba shu mutdur hi ka sah kaba shu mutdur”.
Haba kylli la ka rai jong u MDC ka Mawkhar-Pynthor bad MLA barim ka Mawsynram ban iakhun ha kane ka elekshon ban wan na Pynthorumkhrah Constituency kam buh jingma satia ia u, une u Nongialam ka BJP ula ong ba um ju kheiñ troiñ satia ia ki kyrtong kiba iakhun pyrshah ia u namar baroh hi ki kyrtong ki dei kiba khlaiñ.
“Baroh ki kyrtong la ki dei na ki National Party ne ki Regional Party ki dei kiba khlaiñ suda, ngi hap ban iakhun ia baroh ki kyrtong kiba iakhun ban ioh ia ka jingjop” ong u Bah Hek.
Halor ka rai u pyrsa Bah Rocky Hek ban iakhun pyrshah ia u, u Bah Hek ula ong ba kane ka dei ka kam iing kam sem bad kan ym don jingktah satia ia u ha ka elekshon ban wan.
“Ka iing ka sem kan sa pynbeit ia kane ka kam. Ngim kwah ia ki Political Party ne ki briew ba nabar ba kin tuklar, bad hooid kila don ki briew kiba la ai jingmut hynrei kum ka iing ka sem, ngin sa pynbeit hi ia kane ka kam bad kam don jingeh satia” ula ong.
Haba pynpaw ia ka jingsngewskhem ha ka elekshon ban wan,u Bah Hek ula ong “Ngam dei satia u MLA uba treikam tang ha ka por elekshon. Baroh shisnem nga la trei haba nga don ha JYlla, nga iakynduh ruh ia ki paidbah bad sngap ia ki jing eh jong ki paidbah ka Constituency. Kane ka dei ka rukom treikam jong nga ha kine ki 25 snem bala leit noh”.
