Ha ka 10 tarik u Jylliew, u Lat ka Jylla u Satya Pal Malik ula bthah ia ka sorkar Jylla ban thung ia ka jingtohkit halor ka jingbym lah ki ADC ban aiti ia ki Accounts jong ki snem ba la leit noh.Kane ka la mih hadien ka jingioh pdiang ia ka shithi na ka Ophis u Comptroller and Auditor General ka India myn ha ka 8 tarik Jylliew, ba iadei bad ka jingbym lah jong ki ADC ban aiti ia ki account la bun bun snem bad ka jing bym wanrah ia ka kaiphod CAG ha ki Iingdorbar jong ka Council.
Haba kylli la ka sorkar kan thung ia ka jingtohkit halor kane ka jingpynslem, u ma Lahkmen ula Ong ba watla um pat peit ia ka shithi na u Lat ka Jylla hynrei ka Sorkar ka la dep khot jingialang bad ki lai tylli ki ADC kata ka KHADC, JHADC bad GHADC.
“Ngi lah btah ia baroh lai tylli ki ADC ba ki dei ban jubab ia ka CAG bad ruh ban phah copy sha ngi khnang ba ngi ruh ngin tip.Hynrei haduh mynta, ngim pat ioh eiei na ki ADC. Ngi dang ap mynta ia ka jubab jong ki ” ula Ong.
Nalor kane, u Myntri ka Tnad DCA ula pyntip ba ka Tnad ka lah ban jur ia ki ADC ba kin pynthymmai janai bha halor ka rukom pynlut pynsep na ka pla pisa.
“Ki don ki ADC kiba la pyrshang ban pynbiang ia ki jingdonkam ba la kdew ha ka kaiphod jong ka CAG ha ki snem ba la leit noh. Nga kyrmen ba ha kane ka kynti ruh kin pyrshang katba lah ban pynbiang khnang ba rukom pynlut pynsep ha ki snem ban wan kin long noh kiba shai” ula Ong.
U ma Lahkmen ula pyntip ruh ba kat kum ka kaiphod CAG, ki ADC kim shym la aiti ia ki jingkhein jingdiah naduh u snem 2009, 2010 bad 2011.
