Agartala, Jylliew 15:Ka tnat pulit ka Tripura ka la pyntip ba ka la pynjur ia ka jingpahara nalor ki kynhun peitngor ha baroh ki sawtylli ki constituency na ka bynta ka jingpynlong ia ka ilekshon shiteng samoi ha ka 23 tarik mynta u bnai.
Kane ka jingpynjur ia ka jingpahara ka long ban khanglad na kino kino ki jingjia ki ba lah ban jia bad khnang ban pynlong ia kane ka ilekshon ka ba iaid beit iaid ryntih. “Lait noh na ka jingjia ka ba malu mala hapoh 57-Jubarajnagar assembly constituency, ym shym la don kiwei pat ki jingjia kat haduh mynta.
Na ka liang ka tnat pulit ka Tripura ka la ong ruh ba ka kynhun Flying Squad bad ka kynhun Static Surveillance ki la don ha baroh kine ki constituency na ka bynta ban khmih bniah halor ka jinglong jingman baroh.
Haduh 20 kompeni ki bor pahara central armed police force (CAPF) bad san kompeni ki bor pahara ka Tripura State Rifles (TSR) ki la don ha kine ki jaka na ka bynta ka jingpyniaid beit ia kane ka ilekshon shiteng samoi na ka bynta ki seat ki ba la kylla thylli, kata ki ba kynthup ia ka Agartala, Town Bordowali, Surma (SC) bad ka Jubarajnagar .
