Shillong, Jylliew 15: Ki paid ieid phutbol ka jylla mynta ka sngi Palei, ka 16tarik Jylliew, kin sakhi ia ka jingiakhun kaba itynnad bha ha ka jingialehkai phutbol Shillong Premier League kaban long ha madan Third Ground, Polo ha ka por 4:00 baje janmiet.
Kumban shu kdew hangne, ka Lajong ka la ioh bankhur haduh lai sien ia ka nam lahduh ha katei ka lympung kata ha u 2014 bad ha u 2016 ha shwa ba ka Langsning pat kan ioh ban khur ia ka nam lahduh ha u 2017 bad 2018. Hadien kane ka Shillong Lajong ka la ioh ban wanphai biang pat sha ka nam lahduh ha u snem 2019, kaba dei ka samoi kaba khatduh ha shwa ban wan syllad artad ka khlam COVID.
Baroh ar tylli ki kynhun kiban iakhun mynta ka sngi ki dei kiba mar ia biang bor bha namar ki die kiba la ioh ban khur lang ia ka nam lahduh. Na ka liang u coach jong ka Lajong, u Bobby Nongbet u la ong ba mynta ka kynti ki don ia ka kynhun kaba kham khynnah lada nujor bad u snem 2019.
Haba phai pat sha ka Langsning, katei ka kynhun watla kam shym la don ia ka kynhun kaba khlain ha u 2019 da kaba wan haduh ka kyrdan kaba saw hynrei mynta pat ka la ioh ban wanrah da uwei u rang ba kynsai ban pynbeit ia kitei baroh, kata u Dibinroy Nongspung. Nalorkata ka la soi ruh ia u rangialehkai ka Nangkiew Irat, u Roikhihbha Nongtdu bad u rangialehkai pdeng madan, u Batiphar na Nongrim Hills. Ka kynhun ka dang pynneh ruhia u Kitboklang Pale bad Kynsaibor Lhuid shakhmat.
“Ka SPL kadei kawei na ki lympung iakhun kaba heh tam ha ka jylla bad kumta ngi kyrmen ba ngin lah ban ialehkai bha,” ong u Assistant Coach ka Langsning, u Dapmon Tariang.
