Shillong, Jymmang 20: Ka Iingkashari District and Sessions ka West Jaintia Hills, kala rai pynrem ia u Pulit barim ka jylla u Sub-Inspector Glithstone Ch Marak halor ka jingiap uwei u samla ba 29 snem ka rta ha along bad hukum ba dei ban set 2 snem ia une u heh Pulit ha phatok kum ka jingpynsajia.
U District and Sessions Judge NA Khan haba shim ia ka rai ha ka sngi Balang, ula shem ba u Marak ula leh bakla halor ka jingiap jong u Emsalon Tariang ha Raliang Police Out Post , kaba jia ha u bnai Naiwieng jong u snem 1997.
Katkum ka kyrwoh kaba la phah da u Superintendent of Police ka West Jaintia Hills, ula pyntip ba katei ka jingjia kala jia ha ka 16 tarik u Naiwieng 1997.
“Ha ka 16 tarik u Naiwieng 1997, ha ka por kumba 1 baje mynstep, u SI GC Marak (ha katei ka por uba long u in-charge ka Raliang Out Post) bad ki nongtrei jongu kila kem ia u Emsalon Tariang na ka iingsah jongu khlem kano kano ka jingai ia ka daw jong ka jingkem”
“Ka kmie jong une u samla kala kynnoh ba ki pulit ki dei kiba la shoh khawiang bad kila shoh la bom haban da jem bad ka byrngem byrsit ia u khun jongka hapoh ka Out Post. Wat hapdeng ka jingkyrpad, kila kyntait ban pyllait ia u. Hynrei ha ka sngi kaba bud ha ka por 7 baje mynstep, ka kmie kala shem ba u khun jongka ula thiah iap bad lyngkhuid hapoh ka police outpost,” pynpaw ha ka kyrwoh.
Ia kane ka case la rejistar ha Jowai PS Case No. 104(11)97 hapoh ka kyndon 302/34 IPC bad la tohkit bad aiti ia ka chargesheet da u Officer In-Charge ka Jowai Police Station uba ha katei ka por u dei u Inspector Nila Kalita.
“Hadien ba la pyndep ia ka jingtian bishar kaba la 29 snem, ka iingkashari kala shem ba une uba shah kynnoh ula leh bakla” ong ka kyrwoh.
Haba hukum ia ka jingpynsajia, ka iingkashari kala khmih ia kiba bun ki bynta, “Da kaba buh hakhmat ia ka jinglong jingman bad ia ki daw kiba mih, kynthup ia ka jingkynjoh u nongshah kynnoh ia ka 64 snem ka rta, ka jingshah weng kam bad ka jingbym don ia kino kino ki dak sniew, ka iingkashari kala sngewdei ban hukum ba ia u Glithstone Ch. Marak dei ban shah set 2 snem ha phatok ryngkat bad ka jingshah dain kuna kaba T.2,000,” bynrap u SP.
