Nongpoh, Lber 04: Arngut ki briew kiba dei ki shiparalok ki la khlad noh hadien ba ki la ngam jyllop ha kawei ka wah kaba don ha Gunpati, kaba hap ha khappud ka jylla Meghalaya bad Assam kaba dei ruh ka jaka jngohkai pyrthei kaba paw ha ka thaiñ Rani Bari, Jirang.
Katkum ka khubor ba la iohlum, la iathuh ba kine ki arngut ki dei kiba la tip kyrteng kum u Joy Rani Wary bad u Bivar Boro kiba don ha ka rta kaba 33 snem bad kiba na ka shnong Kharghuli Assam.
Ka khubor ba iathuh ba kine ki arngut ki la leit kai sngewbha sha katei ka jaka jngohkai ha Gunpati lem bad 3 ngut kiwei pat bad ki la iajngi ha ka wah kaba don ha katei ka jaka hynrei kine ki arngut kila ngam jyllop namar ka jingbym nang jngi.
Ki paralok kila pyrshang ban leit iarap hynrei namar ka jingjylliew ka wah, kim shym la lah satia ban sei ia ki. Da ka jingleit iarap ki nongshongshnong, la ioh sei ia kawei ka met bad hadien da ka jingpoi ka kynhun National Disaster Response team, la ioh ban sei sa ia uwei.
Ki Pulit ka Ri-Bhoi kila hiarsha katei ka jaka ban pynlong ia ka jingtohit bad ia ka met la pynkit noh sha Civil Hospital Nongpoh ban leh ia ka post mortem.
