Tura, Risaw 07 : Ka jingiap ki briew ha Ri-lum Garo na ka jingther u slap kala nang kiew biang bad kala poi mynta sha ka 17 ngut hadien ka jingngam jyllop sa 2 ngut ki khynnah ha North Garo Hills.
Kine ki khynnah kiba iap ki dei kiba la ithuh da I Silarin R Marak ba 8 snem bad I Tangme R Marak ba 3 snem. La iathuh ba kine ki khynnah kila hap hapoh ka thliew kaba shlei da ka umslap ha ka shnong Bate Apal-Bangsi Apal. Kane ka jingjia kala jia ha ka sngi Saitjain.
La iathuh ba kine ki khynnah ki dang iamuja ialehkai harud iing bad kila syntuid sha kane ka thliew kaba la tih ban shna painkhana.
Ka jingther slap ym tang ba kala pynshlei um ia ka thliew hynrei kala pynjynjar ruh ban iohi ia ka, kaba la pynlong ia kine ki khynnah ban hap shapoh.
Da kane ka jingjia, ka jingiap briew kala jia ha ki 4 na ki 5 tylli ki District ka Ri-lum Garo ba kynthup ia 3 ngut ha East Garo Hills, 5 ngut ha West Garo Hills, 7 ngut ha South Garo Hills bad mynta sa 2 ngut ha North Garo Hills, kaba pynlong baroh haduh 17 ngut kiba iap.
