Shillong Naiwieng 29: U MLA ka BJP u Bah Sanbor Shullai, hynne ka sngi Balang ula pynpaw ba ym don jingthmu satia ban mih iakhun iaka elekshon MP Lok Sabha hynrei lada jia ba ka BJP ka bthah yn ym kyntait bad yn kohnguh kumba ula leh ha u snem 2019.
“Nalade hi, ngam don jingmut eiei ban iakhun iaka elekshon MP bad wat ha ka MP elekshon kaba la long ha u 2019 ngam shym la don jingmut eiei hynrei 3 taiew shwa ka jingthep vote, ka seng BJP kala jied ia u ban iakhun ia ka elekshon MP Lok Sabha. Namar ba nga dei u dkhot uba don akor jongka seng watla nga la tip ba ngin ym poi sha ka thong ha katei ka por, hynrei nga la leit ban thep kyrteng kum u kyrtong ka BJP ban iakhun ia ka elekshon watla nga la ioh por tang 3 taiew ban pynkhreh iaka elekshon” ong u Bah Sanbor Shullai.
Ula ong, ba ula ioh por tang 3 taiew ba ka long kaba eh shibun ban treikam na ka bynta 36 tylli ki Constituency hynrei kaba sngewtynnad ka long ba ha ki Constituency kiba don ha sor ula jop ia ka elekshon katba ha ki constituency kiba don ha nongkyndong ym shim la ioh ia ka jingjop.
Haba kylli lada jia ba ka BJP ka bthah ba dei ban iakhun biang ia ka elekshon MP mynta ka kynti ruh, na ka liang u Bah Sanbor ula ong “Lada ka wan kum kata ka jingbthah kumba long kumjuh ha u snem 2019, kum u dkhot ba don burom jong ka seng ngan hap ban leit thep kyrteng bad ban pan ia ka jingkyrshan na u paidbah ban pynjop ia nga haka elekshon”.
U Bah Sanbor ula ong ba ka seng BJP kadei ban pynbna iaka kyrteng u kyrtong 6 bnai shwa ban long ka elekshon MP, namar ka long kaba jynjar bha ban treikam tang da ki taiew ha ki 36 tylli ki constituency bad kan long kaba eh shibun ban pynsngewthuh ia ki paidbah ba kin ai ia ka jingkyrshan.
“Ka BJP kadei ban pynbna iaka kyrteng u kyrtong 6 bnai shwa ka elekshon, khnang ba yn ioh por bun bha ban leit ialap elekshon khamtam eh ha ki jaka kiba don ha ki thaiñ nongkyndong namar ha ka MP elekshon na Shillong Parliamentary Constituency ka kynthup haduh 36 tylli ki Constituency” ong u Bah Sanbor.
Haba kylli la u Myntri Sorkar u Bah AL Hek uba pan tiket naka BJP yn jop ia ka elekshon MP, u Bah Sanbor ula ong, “Nga la shu iohi tang ha ki kot khubor ba u Bah Hek ula pan tiket hi dalade ban iakhun iaka MP elekshon hynrei kan shong ha u paidbah ban rai la u Bah Hek yn jop ne yn ym jop. Hynrei kum u dkhot jong ka BJP, lada ka seng ka ai tiket iano iano ruh, ngan mih beitshakhmat ban ialap elekshon bad ban trei shitom ban pynjop ia u kyrtong lada dei ba ioh tiket u bah Hek ruh”.
U Bah Sanbor ula ong ba ym don jingtip katno ngut kiba la pan tiket na ka BJP hynrei kaba u tip kadei tang ka kyrteng u Bah Hek kumba la mih ha ki lad pathai khubor bad ki 3 ngut kiwei pat.
