Shillong, Risaw 04 : Ki dkhot ka Academic Council (AC) ka North Eastern Hill University (NEHU) kala bthah ia u Vice Chancellor bad Chairman ka Academic Council Prof P Shukla, ba un khot ia ka jingialang ba kyrpang/kyrkieh ha kaban iatai halor ka jingkynnoh pyntreikam khlem iahap ia ka National Education Policy (NEP) 2020 ha ka kyrdan Under Graduate na ka bynta ka samoi 2023-24 khlem ka jingmynjur ka Academic Council.
Ia kane ka rai la shim hadien ba u Vice Chancellor ula pynpaw ia ka jingbym kwah ban khot ia ka jingialang ba kyrkieh jong ka Academic Council wat hapdeng ki jingkyrpad ba bun da ki nonghikai lygba ki synjuk jong ki lem bad kiwei kiwei ki kynhun, ong uu President ka Teachers Association (NEHUTA) Prof Lakhom Kma ha ka kyrwoh bala pyllait hynne ka sngi Balang.
U iathuh, “Ki dkhot ba don jingkitkhlieh jong ka AC ki sngewkhia jur halor ka jingkyntur ia u pud ba iadei bad ka bor jong ka AC bad ka jingpynhein ia ki kyndon bad rukom treikam kat kum ka NEHU Act, Statutes bad Ordinance”.
“Kumta, ki Dkhot kila bthah ban khot ia ka jingialang ba kyrpang/kyrkieh jong ka Academic Council ban iakren halor ka jingpyntreikam ba khlem iahap ia ka NEP 2020 ha ka kyrdan UG ha ki college bala pyniasoh bad ka NEHU khlem da ioh ia ka jingmynjur jong ka Academic Council kat kum ka Regulation RA-5, Clause 13, under Clause (1) (a) bad (2) of Statute 42,” bynta u Prof Kma.
Une u Nonghikai ula ong ba ki dkhot ka Academic Council kim kwah satia ban iakren halor ka jingpynsangeh noh ia ka jingtreikam ka NEP hynrei halor ka jingdonkam kyrkieh ban pynbeit ia ki rukom pyniaid ba bakla.
Palat 100 ngut ki dkhot jong ka Academic Council na Shillong bad Tura Campud ka NEHU kila iasoi ia ka jingdawa ban khot ia ka jingialang ba kyrkieh/kyrpang ka AC, kaba long palat ia ka jingdonkam paid ba shipawa na ka laipawa ka jingdon ki dkhot ka AC kat kum ka Regulation RA-5, Clause 13, under Clause (1) (a) bad (2) of Statute 42, ong u Prof Kma.
