Jowai, Risaw 04 : Ki Nongtrei jong ka Jaintia Hills Autonomous District Council (JHADC) kiba don ha ka lama jong ka JHADC Staff Employee Association, hynne ka sngi Balang kila pynlong ia ka jingiakhih paidbah ha phyllaw ka Council namar ka jingbym ioh tulop naduh u bnai Rymphang, 2022.
Lah ban pynkynmaw hangne, ki Nongkitkam ka Association ha u Naitung 2022, kila hap ban panmap hakhmat ka Executive Committee jong ka Council namar ka jingiakhih ba ki pynlong bad kane kala jia hadien ka jingkular jong u Myntri Rangbah ka Jylla Conrad K Sangma, ban siew noh ia ka tulop shuwa ka lehniam Behdieñkhlam.
Haba iakren bad u President ka Association Johnson Pohrmen, ula pyntip ba ki Nongkitkam kila shah pynbor ban panmap khnang ba ki nongtrei kin ioh noh ia ka tulop kaba la kot haduh T. 35 klur ban sa pyllait ha ki khyndiat sngi.
“Namar ka jingbym ioh satia ia ka tulop kat haduh mynta, la pynbor ia ka Association ban shim ia ka rai iakhih bad ban ym kynran dien shuh tad haduh ba ka jingdawa kala seisoh” ula ong haba bynrap “Ki nongtrei kila kloi ruh ban mad ia kano kano ka jingpynshitom namar kane ka jingiakhih”.
