Shillong, Naiwieng 13 : Ka Meghalaya bad ka Mizoram kila rung sha ka phainal jong ka jingialehkai phutbol U-21 ki shynrang ha ka 2nd North East Olympic Games 2022, ka ban long ha madan ialehkai MFA Turf, Polo.
Ka Meghalaya kala ioh rung sha ka phainal da ka jinglah ban pynliem haduh 3-0 kol pyrshah ia ka Manipur ha ka jingiakhun Semi Phainal hynne ka sngi. Ia kine ki kol la thep da u Figo Syndai ha ka minit ba 11 bad Nelson Rymbai ha ka minit ba 20 jong ka kylla step lem bad ka kol jong u Everbrightson Mylliempdah ha ka minit ba 88.
Shuwa kane ka jingiakhun, ka Mizoram kala behthong ia ka Nagaland na ka jingshah thep shi kol ban jop pat da 3-1 kol ha ka jingiakhun semi phainal.
Ia ka kol jong ka Nagaland la ioh ban thep da u Pursunep ha ka minit ba 11 bad namar ka jingialehkai brut bha jong ka Nagaland, ka Mizoram kala ioh ia kawei ka penalty bad ia ki artylli ki kol ba hadien la thep da u Aron Vanlalrinchhana ha ka minot ba 39 bad u Rohlupuia ha ka minit ba 51.
Ka Manipur bad ka Nagaland kin hap ban iakhun mynta ban ioh ia ka takma rnong ha ka jingialehkai ka ban long la sngi ba-ar ha ka por 4:30 baje janmiet.
Ka jingialehkai semi phainal jong ki kynthei kan long ha ka sngi nyngkong ha kaba ka jingiakhun ba nyngkong kan long hapdeng ka Manipur bad ka Mizoram ha ka por 11 baje mynstep bad ka Arunachal Pradesh pyrshah ia ka Sikkim ha ka por 4:30 baje janmiet.
