Nongpoh, Naiwieng 13 : Ki Pulit ka 6th Battalion Meghalaya Police, Umiam kala rakhe ia ka sngi ki Khynnah (Children Day) hynnin ka sngi saitjain bad pynshlur ia ki Khynnah kiba la pep skul shiteng por ba kin leit phai biang sha ki jingpule.
Ia kane ka jingrakhe la pynlong ha phyllaw ka Police Training School bad Meghalaya Police Academy, Umran ha ka jingiatreilang bad ka Meghalaya State Legal Services Authority (MSLSA) bad ka Faith Foundation, Shillong. La rakhe ia kane ka sngi halor ka phangpdeng “Back to School-Safety & Security).
Ki Pulit ka 6th BN MLP bad ka PTS/MPA, Umran kila phai biang sha ka jinglong khynnah skul da kaba phong ia ki jain skul barim bad iakren iakhana bad ki Khynnah kiba la wan iashimbynta ha kane ka jingrakhe.
Ka jingthmu halor kane ka jingrakhe ka long ban aimynsiem ia ki Khynnah ba kin iai neh ha ki jingpule ha skul bad ban pyndep ia ki jingpule, ban pynshlur ia ki Khynnah kiba la pep skul shiteng por ba kin leit phai biang sha skul bad pyndep ia ki jingpule.
Kane ka jingrakhe kala sdang ha ka por 9 baje mynstep bad ki Pulit ki khynnah kila ioh iakren iakhana bad ki pulit halor ka jingtreikam ka Tnad Pulit, ki tiar iakren jong ki Pulit, ka jingbatai halor ki kam thombor pyrshah ia ki kynthei bad khynnah, ka jinghikai halor ka koit ka khiah bad kiwei kiwei.
Kala don ruh ka jingpynialehkai ia ki Khynnah ba la pynbud da ki jingpynbyrngia jong ka kynhun Meghalaya Police Cultural Troupe kiba la tem ia ki jingrwai bad ki jingshad naka bynta ki khynnah.
