Shillong, Naiwieng 29: Hynne ka sngi Balang, la lah ban pyndep ia ki jingiakhun jongka Quarter Final jong ka 7th Elite Men’s National Boxing Championship kaba la long ha SAI Indoor Hall, ha kaba ki khlur iakura kiba paw ki la jam sha ka Semi Final.
Ha kane ka sngi, u Myntri Rangbah ka Jylla u Conrad K Sangma ula wan sakhi ia kane ka lympung iakura ha kaba ula ioh ban iakren bad ki rangiakura bad ula pynlut por ruh ha kaban sakhi ia katto katne ki jingialehkai.
U Conrad Sangma ula iakynduh ruh ia ki khlur iakura kum u Shiva Thapa bad u Amit Panghal lem bad ki khlur iakura barim jong ka Jylla kiba la long mynta kum ki coach kata u Torak Kharpran lem bad ka Roshni Bhusal.
Na ka liang ka MBA ka la ai sngewbha ia u Myntri Rangbah da shijur ki ‘Boxing Gloves’.
Uwei na ki dkhot ka BFI u SK Shandil, ula ai jingiaroh halor ka jinglah ban pynbiang nadong shadong bad ruh ka jingpynlong ia kane ka lympung bad ula pynpaw ka jingkyrmen ba kum kane ka lympung kan long ka jingai mynsiem ia ki nongialehkai ka thain shatei lammihngi ba kin shimkhia ha ka kam iakura.
Lah ban kdew ba ha kane ka lympung kila don haduh 104 ngut ki rangiakura kiba la wan kylleng jong ka ri ban iashimbynta ha ki 13 tyli ki kyrdan ialehkai haduh ba la lah ban pyndep ia ka quarter final hynne ka sngi.
Kham hashwa, u khur iakura uba long u lahduh ha ka Asian Games 2018 u Amit Panghal na ka Services ula khur ia ka jingjop ha ka Flyweight 48-51 kg lyngba ka jingiarai lang da ki nongbishar pyrshah ia u Md Aarif uba na Jammu and Kashmir. Kane ka jingjop ka la long kumjuh ruh ia u rangiakura na Assam u Shiva Thapa, ha kaba une u khlur iakura ia uba la khur takma hynriew sien ha ka Asian Championships, u la jam sha ka semi final ha ka Light Welterweight 60-63.5kg hadien ka jingjop ia u Shashank Pradhan na Delhi.
U lahduh ha ka Asian Champion 2021 u Sanjeet jong ka Services ula khur jingjop ha ka quarter final pyrshah ia u Naman Tanwar na Railways ha ka kyrdan ialehkai heavyweight 86-92 kg.
Kumjuh u Sagar, uba la khur ia ka takma rupa ha ka CWG 2022, jong ka Railways u la khur jingjop pyrshah ia u Navjot Singh na ka Chandigarh ha ka super heavyweight 92kg. ha kane ka jingiakhun na ka liang u rephri u la hap ban pynsangeh tang ha ka wat kaba u Sagar ula kura tyngeh ia u rangiakura ka liang pyrshah.
