Shillong, Naitung 01: Ki Nonghikai Adhoc kiba don hapoh ka lama Federation of All School Teachers of Meghalaya (FASTOM) kila nang wan tuid sha Nongbah Shillong ban iashimbynta ha ka jingiakhih ba khlem pud ban pynbor ia ka Sorkar Jylla ba kan mynjur noh ha kaban pynkiew ia ka tulop ka jong ki.
Kane ka jingiakhih da kaba iashong paidbah hakhmat ka Secretariat, kaba poi mynta sha ka sngi kaba saw, kala nang sakhi ia ka jingwan ki kynhun Sengbhalang bad seng sain pyrthei ban pyni ia ka dak ka jingkyrshan ia kane ka jingiakhih.
Ki Nonghikai kiba shong iakhih kila nang bun paid katba nang iaid ki sngi bad hynne ka sngi thohdieng, la antad ba ka jingdon jong ki nonghikai ba iashimbynta kala kot sha ka 1000 ngut eiei bad kine ki dei kiba wan na kylleng ki District jong ka Ri-lum Khasi Jaintia.
Ha Ri-lum Garo Hills ruh, ka jingiakhih jong ki Nonghikai Adhoc kala long hakhmat ka Mini Secretariat kaba don ha Tura bad ki Nonghikai na kylleng ki District ka thain, kila iashimbynta ha kane ka jingiakhih.
Ka seng Hynniewtrep Youth Council bad ka seng All India Trinamool Congress kila leit jngoh ia kine ki nonghikai ba iakhih hynne ka sngi thohdieng hajan Additional Secretariat.
Kane ka jingiakhih ki Nonghikai Adhoc kala sdang naduh ka sngi ba-ar jong ka taiew halor ka jingbym lah jong ka Sorkar ban mynjur noh ia ka jingdawa jong ki ban pynkiew ia ka tulop kumba la kular dang shen.
U Nongialam ka AITC bad Chief Whip ka Liang Pyrshah Bah George Lyngdoh ula leit iakynduh ia kine ki nonghikai ba iakhih bad ong ba naduh kaba sdang, ka AITC kala kren shai ba kan ai ia ka jingkyrshan ia ka jingdawa ba shonghok jong ki nonghikai.
Une u MLA ka Umroi ula ong ba kam dei satia ka kam ba ka Sorkar kam tip, ka don lut ia baroh ki jingtip halor ki jingeh jong ki (Nonghikai), hynrei na ka por sha ka por, ngi la kren ia kine ki kam hapoh ki Dorbar jong ka Iingdorbar Thaw Ain ka Jylla bad ngin dang iai kren ruh nangne shakhmat.
Lah ban kdew ba ki Nonghikai Adhoc kiba don hapoh ka lama jong ka Federation of All School Teachers of Meghalaya (FASTOM) kila sdang ia ka jingiakhih ba khlem pud da kaba iashong paidbah hakhmat ka Secretariat ha Nongbah Shillong bad ha ka Mini Secretary ha Tura, naduh ka sngi ba-ar jong kane ka taiew.
Ki Nonghikai Adhoc kila dawa ia ka Sorkar Jylla ba kan pynkiew noh ia ka tulop jong ki da T.18000 bad ka increment ba 5% shisnem.
