Shillong, Naitung 01: U Myntri Sorkar bad MLA ka Mylliem Constituency Bah Hamletson Dohling, hynne ka sngi thohdieng, ula phah jingthoh sha ka National Highway Infrastructure Development Corporation Ltd (NHIDCL) ba kan maramot noh mardor ia ka surok Upper Shillong kaba la jot na ka jingther u lapbah dang shen.
Ia kane ka shithi la phah sha u Managing Director ka NHIDCL ba kyntu ban phah maramot ia ka surok naduh na Jingkieng Umshyrpi haduh ha 12 mer Upper Shillong.
U Myntri ula pyntip sha ka NHIDCL ia ka jingjot ka surok ha kane ka thain na ka daw ka jingther u lapbah uba la wan lynshop ha u bnai bala lah hapoh ka Jylla baroh kawei.
Haba pynpaw ruh ia ka jingsngewkhia ia ka jingdheng kali kaba la buh jingeh ia ki nongleit nongwan namar kane ka jingsniew ka surok, u Myntri ula kyntu ia ka NHIDC ba kan sdang noh kham kloi ia ka jingmaramot.
