Shillong, Jylliew 29: Ka National People’s Party (NPP) ka nang pynkhlain shuh shuh ia ka jingdon jongka ha Manipur, hadien ba katto katne ngut ki nongialam sain pyrthei kiba ih bha haka kam sain hima ki la pyn iasoh ialade bad ka NPP ha ka prokram kaba la long ha nongbah Kohima ka Jylla Nagaland.
Ia kine ki dkhot ba thymmai la pdiang sngewbha da u President ka NPP uba dei ruh u Myntri Rangbah ka Jylla Meghalaya u Conrad K Sangma, uba la batai ia kane kum ka por kaba sngew sarong kaba pyni ia ka jingnang roi jong ka NPP ha ka thain shatei lammihngi (North East).
U Conrad u la pynkynmaw ïa ka jingïaid lynti jong ka Party naduh ba la pynkylla dur ïa ka ha u snem 2012, da u kpa bad nongseng jong NPP u P.A. Sangma, u la shimti ia ka kam kum u National President jong ka Party.
U la kubur ia ki jingeh kiba bun ba ia kynduh ha ka ban tei ia ka NPP naduh tynrai ha ka thain shatei lammihngi, hynrei u la ai burom ia ka jingjop ha ka jingshaniah, ka jingaiti, bad ka rukom treikam kaba pyrkhat jylliew ia ki mat jong ka thain Shathei Lammihngi.
“Ka jingthaw ia ka party kam dei ka kam kaba suk. Ka long kaba tynjuh bha, khamtam namar ba ki don shibun kiei kiei ha ka sain pyrthei haka thain kiba ngim lah ban iehnoh. Hynrei lyngba ka jingiaishah bad ka jingtrei shitom, ngi la lah ban pynher ia ka lama ha jrong bad ban buh ia ka dak ha ka sain pyrthei jong ka ri” la ong u Conrad.
U Conrad u la kdew ba ka NPP ka dei tang ma ka ka seng riewlum kaba la kha bad tei pura da ki paidbah ka thain shatei lammihngi, khlem ka jingdon bynta lang kiba na nabar ka thain Shathei Lammihngi.
“Ka NPP la kha ha ka thain shatei lammihngi, kaba la tei da ki paidbah ka thain shatei lammihngi, khlem kano kano ka jingdon bynta lang kiba na nabar ka thain Shathei Lammihngi. Mynta ka sngi, da ka jingsngew sarong ngi ieng kum ka party kaba tang ma ka na ka thain kaba don ia ka kyrdan national party. Kata ka dei ka kam kaba khraw” u la ong.
Ka jingpynrung ïa ki nongïalam thymmai na Manipur la khmih lynti ba kan nang pynskhem shuh shuh ïa ka nongrim bad ka jingïatylli jong ka Party ha kylleng ka thaiñ.
Ha kane ka jingïalang, u Conrad u la ai khublei ruh ïa ka Ane-ü Khaming halor ka jingshah thung kum ka National President ba thymmai jong ka National People’s Women’s Front (NPWF).
