Shillong, K’lyngkot 08 : Ka jingbym lah ban pynioh ka Public Health Engineering (PHE) ia ka jingbit na ka Hima Mawphlang ban tei ia ka Pumping Station marjan ka Wah Umiew, kala nang pynslem shuh shuh ha kaban pyndep ia ka Greater Shillong Water Supply Scheme (GSWSS) Phase-III.
“Ka kam kam dei satia halor ka pisa ba donkam hynrei ka iatakhuh bad ka Hima Mawphlang (ka ban dang ai ia ka jingbit ia ka Tnad ban pyntrei ia ka Pumping Station)” ong u Myntri ka Tnad PHE Marcuise N Marak.
“Ngi la shimkhia ban buddien bha ia kane ka kam bad ka Sorkar ka dang ap mynta ia ka rai jong ka Hima Mawphlang” ula ong haba bynrap ba hadien ka jingiapynbeit ia kane ka kam bad ka Tnad, ngin sa lah ban buh ia kawei pat ka thong ban pyndep ia ka GSWSS-III.
U Myntri ula iathuh ba ka Hima Mawphlang ka khlem ai jingbit (ban thied jaka) watla ka Sorkar lyngba ka jingialang jong ka Kynhun Myntri kala dep rai ban thungkam ia palat 22 ngut ki briew.
“Kaei kaba kala dawa, ka Sorkar kala mynjur” ula bynrap.
Ula iathuh ba ka Sorkar ka dang donkam jaka hynrei kane ka shong ha ka Hima Mawphlang lem kumta kiei kiei baroh ki dei kiba la biang nadong hadong ban pyndep noh ia ka Phase-III jong ka GSWSS.
“Ka jingai jingbit ka long kaba donkam ban pyntrei ia ka Pumping Station, ban pump ia ka um na ka wah Umiew sha ka reservoir bad hadien sha ka treatment plant” ula ong.
Ka tyllong khubor ka kynnoh ba ka jingdawa jong ka Hima Mawphlang kala nang mih nang mih tang namar uwei u briew.
Namar kata, ka Tnad PHE kala iakynduh ia ki Rangbah Shnong ban iakren ia kane ka kam bad mynta ki Rangbah Shnong ka thain kila kyrpad ia ka Hima Mawphlang ba kan lum ia ka Dorbar ban iakren ia kane.
“Shen, ka Dorbar kan sa long ban pynbeit ia kane ka kam” ong ka tyllong khubor.
Lah ban kdew, ba shuwa kine kiei kiei, ka Tnad PHE kala pan pisa biang sa T.66 klur ban pyndep ia ka GSWSS-III.
Ka jinglut jingsep jong kane ka project kala nang kiew namar ka jingslem ban pyndep ia ka naduh u snem 2008.
Kumba T.300 klur la dep ban mang ha kaban pynlut bad pyntrei ia kane ka project haduh mynta.
 watla ka Sorkar lyngba ka jingialang jong ka Kynhun Myntri kala dep rai ban thungkam ia palat 22 ngut ki briew){kind=link}