Imphal, Naiwieng 17 : Ka jingbym don shuh ka suk ka sain ha Manipur na ka jingkhie ka thma hapdeng ki jaidbynriew Kuki bad Meitei mynta la palat 18 bnai, kala pynbor ia ka Sorkar Pdeng ban bthah ia ki bor pahara ba kin shim ia ki sienjam kiba donkam ha kaban tehlakam ia ki kam umsnam hapoh ka Jylla.
Ka jingiaumsnam kala khie biang ha ka sngi Saitjain hadien ka jingioh tam ia 3 tylli ki meitap jong ki kynthei bad ki khynnah na Jiribam District ka Manipur.
Namar ka jingiakhih u paidbah kala jur ha Imphal Valley, ka Ministry of Home Affairs (MHA) kala bthah ia baroh ki bor pahara hapoh ka Jylla ba kin shim mardor ia ki sienjam ban wanrah pat ia ka jingshongsuk bad pynneh ia ka suk ka sain haba ong ba ka jinglong jingman ha ka Jylla ka long kaba synjor bha.
Haba jubab ia kane, ka Sorkar Pdeng kala pynjari ia ka kyndon 163 jong ka Bharatiya Nagarik Suraksha Sanhita (BNSS) ha Imphal East, Imphal West, Thoubal, bad Kakching districts. Kala pynjari ia ka korphiw naduh ka por 4:30 baje janmiet jong ka 16 tarik Naiwieng. Ka Tnad kam pohiing kala khang ruh ia ka kor internet ha ki 7 tylli ki District ba kynthup ia ka Imphal West, Imphal East, Bishnupur, Thoubal, Kakching, Kangpokpi, bad Churachandpur.
Haba pynrem ia ki kam umsnam baroh, ka MHA kala ai ia ka jingmaham kaba tyngeh bad ong ba ka Sorkar kan leh da kaba tyngeh pyrshah ia kino kino ki briew ne ki kynhun kila donkti ha ki kam pyntriem.
