Guwahati, Jylliew 19: Ka jingshlem um ha Assam kala nang jubor mynta bad bun ki wah ha kane ka Jylla kala kiew sha u pud ba buh jingma ia ki shnong ki thaw ba ki iaid lyngba bad haduh mynta, kane ka jingshlei um kala ktah ia palat 30 lak ngut ki briew ha kane ka Jylla.
Haduh 1.56 lak ngut ki briew la pynkynriah sha ki 514 tylli ki relief camp (jaka sah ba shipor) bad haduh 4291 tylli ki Shnong kila shah tap ha ka um. Palat 58,000 hectare ki jaka rep kila shah tyllup ha ka um ba shlei.
Tang ha kane ka taiew ba mynta haduh 24 ngut ki briew kila iap na ka jingshlei um bad jingtwa khyndew kynthup ia 8 ngut kiba dang iap ha kine ki arphew saw kynta bala leit noh.
U Myntri Rangbah ka Assam u Himanta Biswa Sarma hynnin ka sngi saitjaiñ ula leit jurip ia ki jaka ba shah ktah ha ka jing shlei um kiba don ha Kamrup bad Darrang District bad ula peit thuh ia ki jinglong jingman ha kine ki jaka bad iakren ruh ia ki lanot ryngkat ka jingbthah ia ki tnad sorkar ba kin ai wut wut ia ki jingiarap.
U Himanta ula leit jurip ruh ia ka sor Rangia bad iakynduh ia ki briew ba shah ktah kiba la shong ha ka jaka sah ba shipor jong ka sorkar ha Fatima Convent School. Ula pynlut katto katne por ha kane ka jaka sah bad peit thuh ia ki jingleit iarap ia ki briew ba donkam jingiarap ba kyrkieh bad ki jingai ia ki jingiarap daki borkhmih ka Sub Division ha ryngkat ka jingia treilang bad ki bor District.
U Myntri Rangbah ula bthah ruh ia u Deputy Commissioner ka Kamrup u Kailash Karthik N ban lum lypa khambun ia ki mar bam bad ki tiar ba donkam khnang ba ki briew ba kylla lanot kin nym mad jingeh na ka jingduna khamtam ki marbam.
Ula bthah ruh ia u DC ban pynbiang ia ki dawai dashin ha ryngkat ka umbam umdih kaba khuid bad ba pahuh ha kine ki jaka sah ba shipor.
