Guwahati, Jylliew 20: Ha kawei pat ka jingjia ka ba sngewsih ka ba la jia namar ka jingshlei um, arngut ki bor pulit ka ba kynthup ia u ophisar in charge ka Kampur Police Station ha Nagaon ki la shah rah noh ha ka umsaw hynne ka step sngi Nyngkong.
Katkum ki tyllong khubor, la ong ba napdeng kitei ki arngut ki ba la jah rngai ia ka met iap jong uwei u pulit langrut u ba dei na katei ka police station la lap hynne ka step sngi Nyngkong katba ia utei u ophisar ym pat shym la lapdien satia.Ka khubor pulit ka iathuh ba kine ki dkhot ka tnat pulit ki la bunkam ha ka ban pynlong ia ka jingtohkit ha ki bynta jong ka Madhupur ka ba hapoh Kampur hadien ba ki la shah rah noh ha ka umsaw.
Ia une u pulit langrut ba la khlad noh la tip kyrteng kum u Rajib Bordoloi, u ba dei u nongshong shnong ka Hujgaon ka ba hapoh Nagaon.Katba ia utei u heh pulit la tip kyrteng kum u Samujjal Kakoti u ba dei na Changsari hapoh Kamrup ym pat shym la lapdien satia bad ia u ba la suba ba u la khlad ha kane ka jingjia.
Na ka liang ki nongshong shnong ki la iathuh ba ki la iohi ia u Kakoti u ba la iaksaid hapdeng ka um saw ka ba rah ia u kata watla kim shym la pyrshang satia ban pyllait im ia u. Ki heh pulit ka thain ki la iathuh ba u Kakoti u dang shu wan pyniasoh shen bad kane ka police station bad u dang dei ruh u ba dang thymmai ha kane ka jaka.
