Yn ban pynbeit noh ia ki kam jaka ka Shillong Contonment
Shillong, Jylliew 21 : U Myntri kam Iada Ri Rajnath Singh ula kular ia ki nongialam ka BJP Meghalaya ba ia ki jingsngewkhia ba ki pynsngew halor ka jingpynkynriah ia ki jaidbynriew Sikh na Them Iew Mawlong bad ki kynrum kynram kam jaka ha Shillong Contonment, yn sa shimkhia noh ban pynbeit noh kham kloi.
Ka kynhun ka BJP ba ialam da u President Rikman Momin, kila leit iakynduh ia u Rajnath Singh ha ka jingwan iuhkjat ha Shillong bad la iakren ia ki kam kiba shu sahteng da ki snem.
U Momin u pyntip sha u Myntri Iada Ri ba ka jingpynbeit da ka jingiasngewthuh jingmut halor ka Them Iew Mawlong ka long kaba donkam na ka bynta ka jingiashongsuk shongsain hapoh ka Jylla bad yn sa shimkhia bha ia ka lyngba ka jingiakren hapdeng ka Sorkar Pdeng bad ki paid Riewlum ka Jylla
Ka President ka BJP East Khasi Hills Priambada Blah kala ong ba ka Jylla kala trei shaid shaid ban wanrah ia ka jingiapynbeit, bad ka jingshimkhia mynta kan nang pynkhlain ia ka jingshaniah hapdeng ki paid Khasi-Jaintia.
Kala pynpaw ia ka jingkyrmen ba ia kane ka kam yn lah ban pynbeit noh ha kane ka samoi treikam jong u Myntri Rangbah Duh Narendra Modi.
Ka kynhun kala pynsngew ruh ia ki jingpynslem ha ka rukom pyniaid kam ha Shillong Contonment.
U Vice President ka BJP Bipen Pradhan ula kyntu ia ka Ministry ba kan pyntreikam ia ka building bye-law bad ban shim rainoh ia ka land policy ba thymmai, kaba la sahkut naduh u snem 2017.
Kat kum ka jingong jong u, ka police ba shipor hapoh ka STR kala pynkiew ia ka dor baiwai jaka kaba kot jan 1000 shah, bad ka jingnang pynslem shuh shuh kan nang buh jingma ban mih ki kam iakajia.
U President ka BJP Shillong City Bob Lyngdoh ula kyntu ban ai jingbit noh ia ka jaka ki shipai ba donkam ban pynheh ia ka surok na Barik Point sha Jhalupara, haba pynpaw ba ka long kaba kongsan ban pynkylluid ia kane ka bynta jong ka sor.
Haba sngap ia kine ki jingpynsngew, u Singh ula ong ba ka Ministry kan sa shong bishar ia kawei pa kawei ka kam bad un sa iakhmih lang ruh bad ki bor ba dei khmih ban peit ia kaei ka lynti kaba lah ban leh.
