Shillong, Risaw 25 : Ka Jylla Meghalaya kala nang jam ia u mawmer ha ka jingpyntreikam ia ka Jal Jeevan Mission (JJM) kaba la pyllait da ka Sorkar India ha u Nailar 2019, bad mynta ka jingtreikam jong ki kor um iing na kane ka skhim kala kot sha ka 4 lak tam ha ka Jylla baroh kawei.
Na ka 4550 tylli ki kor iing ba treikam naduh ka 15 tarik Nailar 2019 sha ka 4,00,812 tylli kila treikam mynta, kaba pyni ia ka jingtrei borbah ka Sorkar ban pynthikna ba ki nongshongshnong jong ki shnong Nongkyngdong, kin ioh ia ka umbam umdih kaba pahuh bad kaba shngain.
U Myntri Rangbah ka Jylla Conrad K Sangma, ula pynbna ia kane ka jingjop ka Meghalaya bad ai khublei ruh ia ka kynhun jong ka Jal Jeeval Mission, Meghalaya.
U Myntri Rangbah ula ong “ Ka Meghalaya kala jam ia ka 4 lak ka jingtreikam ki kor um iing ka skhim Jal Jeevan Mission. Ngi ai khublei bad ai ka jingkitbok ia ka kynhun Jal Jeevan Meghalaya katba ngi dang iaibteng ban kot ia ka 100 % ka jing pynpoi kor um iing hapoh ka Jylla”.
U Commissioner & Secretary ka Tnad Public Health Engineering Department bad Mission Director ka Jal Jeevan Mission ha Jylla Syed Md. A. Razi, ula pynpaw ia ka jingsngew ioh mynsiem bad ong “Kane ka dei ka jingkynjoh ia u mawmer hapoh ka Jylla. Ngim ym shongthait hynrei ban iai bteng ha kaban pynlong ia ka Meghalaya kaba shngain ha ka jingioh ia ka umbam umdih hadien habud. Ka thong jong ngi ka long ba kin shnong ha ki jaka ba kyndong eh kin ioh ia ki kor um iing bad ngin iai bteng tad haduh ban da poi haduh kaba kut”.
Ka jingjop ha ka jingpynpoi ia ki kor um iing hapoh ka Jylla ka iapher na kawei ka district sha kawei pat. Ka East Garo Hills kala kot 80.09%, South West Garo Hills – 79.02%, Ri Bhoi – 72.83%, North Garo Hills – 69.35%, Eastern West Khasi Hills – 67.56%, South Garo Hills – 65.56%, South West Khasi Hills – 65.15%, West Garo Hills – 59.82%, West Khasi Hills – 57.52%, West Jaintia Hills – 50.29%, East Khasi Hills – 50.01% bad East Jaintia Hills – 44.50%.
Ha u bnai Risaw 2022, ka Meghalaya kala wan ba-ar ha ka jinglum jingkhein ia ka jingtreikam ki kor um iing jong ka Jal Jeevan Mission.
