Kohima, Nailar 5: Ka Surok bah National Highway-2 ha Khisama ka la kylla long biang sa shisien ka jingkhanglad kaba khraw, kaba pynthut ïa ka leit ka wan jong ki marbam ba donkam sha Manipur, kaba pynjngai ïa ki shnong ha Southern Kohima district bad kaba pynthut ïa ka jingim ba man la ka sngi jong ki hajar ngut ki nongleit nongwan.
Ki trok heh kiba kit marbam, umphniang, dawai bad kiwei kiwei ki mar ba kongsan sha Manipur ki la sahkut da ki sngi hadien ka jingjulor kaba jur ka surok bah, katba ki nongshong shnong jong ki shnong Southern Angami ki dang ïaleh ban poi sha ki skul, kolej bad ki ïew ki hat.
Ka jingtwa khyndew kaba ju jia man ka por ka la pynthut ruh bunsien ïa ka jingïoh rung sha ka Jakhama Military Camp kaba kongsan bha, kaba la pynlong ïa ki ban sngewkhia halor ka jingshngaiñ jong ka ri.
Ka jingpynthut kaba thymmai ka la pynmih biang ïa ka jingbitar jong ki paidbah halor ka jingtwa jong ka surok bah kaba ju jia man ka por ha ka por tlang watla la pynlong ïa ki kam ban maramot pat kiba jur ha u snem ba la dep.
“Kane ka dei ka snem kaba ar ba ka surok NH-2 ha Khisama ka la kylla long kaba ym lah ban pyndonkam ha ka por slap.La pynlut da ki klur tyngka ban maramot, hynrei ka surok ka la pulom biang”, la ong ki nongleit nongwan bad ki nongshong shnong, da kaba buh jingkylli ia ka jingbha jong ka jingshna bad ka jingthmu kaba neh slem.
“Kaei kaba bakla ha ka jingpynwandur ba ka surok ka twa man ka por lyiur? Ngim donkam shuh ban maramot shipor.Ngi donkam ia ka jingpynbeit kaba neh,” la ong ki nongniah trok bad ki nongshong shnong.
Ka National Highways and Infrastructure Development Corporation Limited (NHIDCL) ka la ong ba ka dang pynkhreh ia ka Detailed Project Report (DPR) kaba thymmai na ka bynta ka jingpynbeit kaba junom ia ka Khisama slide zone. Hynrei ki nongshong shnong ki la buh jingkylli haduh katno ka por kan shim katba ki briew ki dang ïai bteng ban mad jingeh man la ka aiom slap.
Ka Southern Angami Public Organisation (SAPO) bad ka Angami Students’ Union (ASU) ki la kyntu ïa ki bor synshar ban pynbeit biang ïa ka jingïaid ki kali ha ka rukom kaba dei bad ban pynsted ïa ki kam ban pynbeit ryntih ïa ki lum bad ki nala iaid um.
Ki ar tylli ki seng ki la maham ba ka jingthut jong ka surok bah kaba ju jia man ka por ka la iaid lait na kaba dei ka jingeh ha ka leit ka wan, kaba buh jingma beit beit ia ka jingpynpoi marbam sha Manipur, kaba pynthut ia ka pule puthi ha Southern Kohima bad kaba ktah ia ka leit ka wan jong ki bor pahara.
Ki la dawa ia ka jingkitkhlieh na ka sorkar bad ka tnad pyntreikam, da kaba khot ban mynjur mardor ia ka DPR, ban mang pisa bad ban pyntreikam ia ki lad jingiarap ba neh shwa ka jingwan biang jong u slap.
Da kaba ka NH-2 ka shakri kum ka lynti kaba kongsan na ka bynta ka Manipur bad ka lynti kaba donkam bha na ka bynta ki hajar ngut ki nongshong shnong ha ka thain Southern Nagaland, ki nongshong shnong ki la kyrpad ia baroh ar ka sorkar kmie bad ka sorkar Nagaland ban khein ia ka jingtwa khyndew ha Khisama kum ka projek pynroi kyrkieh ym kum kawei pat ka jingpynbha katkum ka aiom.
