Kohima, Jylliew 18: Ka jingtai nia kaba thymmai halor ka jingrakhe ia ka International Day of Yoga ka la mih ha Nagaland hadien ba ar tylli ki Balang Baptist kiba donbor ki la pynpaw ia ka jingpyrshah kaba jur, da kaba kynthoh ba ki nongrim niam bad pyrkhat pyrdain jong ka Yoga kim iahap bad ki jingngeit ba kongsan jong ki Khristan.
Ka jingkynthoh ba thymmai ka dei na ka Nagaland Baptist Church Council (NBCC), ka kynhun ba ha khlieh duh kaba mihkhmat ïa jan 1,500 tylli ki Balang Baptist ha kylleng ka jylla. Lyngba ka tnad ba peit ïa ka imlang sahlang jong ka, ka NBCC ka la pynmih ïa ka jingpynshai kaba pynskhem ba watla ïa ka Yoga la ju pynroi ha ka pyrthei kum ka rukom kilan met bad jingkoit jingkhiah, hynrei ka jingsdang jong ka ka don tynrai bha ha ki riti dustur bad ki jingmut ba kynja mynsiem jong ki Hindu ban ïoh ïa ka jingïatylli bad ka jinglong blei.
Kane ka jingpynshai ka long hadien ka jingpynbna ba la pynmih da ka Nagaland Baptist Pastors’ Union (NBPU), kaba la pyrshah ïa ka jingbthah jong ka sorkar kaba bthah ïa ki skul ban rakhe ïa ka International Day of Yoga ha ka 21 tarik u Jylliew. Ka NBPU ka la ong ba ka Yoga ka don ka jingiadei ha ka histori bad ka philosophy bad ki dustur niam ki bym iahap bad ka jinghikai Khristan bad ka la kyntu ia ki Balang, ki jaka pule bad ki riewngeit ban kiar na kaba iashim bynta ha ki prokram kiba iadei bad ka Yoga.
Ha ka jingthoh ba bniah jong ka, ka NBCC ka la buh ia ki skul tynrai bapher bapher jong ka Yoga, kynthup ia ka Hatha Yoga, Japa Yoga, Kundalini Yoga, Surat-Shabd Yoga bad Tantra, da kaba kynthoh ba ki don tynrai ha ki jinghikai ba kynja mynsiem kiba thmu ban ioh ia ka jingpyllait lane ka jingiasoh bad ka jinglong blei. Katkum ka met jong ka balang, ka niam Khristan ka hikai ba ka jingpynim bad ka jingiasyllok bad U Blei ka wan lyngba ka jingngeit ha U Jisu Khrist ym lyngba ki buit ba kynja mynsiem, meditation practices, ki mantra ne ki jingkilan met.
“Ka mat kam dei bad ka jingkilan met hi, hynrei bad ka jingïohi pyrthei ba kynja mynsiem bad ki jingmut jingpyrkhat ba kynja mynsiem kiba ïadei bad ka Yoga,” la ong ka council, katba ka pynshlur ïa ki Khristan ban wad ïa ka jingroi ba kynja mynsiem lyngba ka jingduwai, ka jingthoh bakhuid, ka jingmane bad ka jinglong synran.
Katba ka NBPU ka la pynpaw ruh ïa ka jingsngewkhia halor ka por ban rakhe ïa ka sngi Yoga mynta u snem, da kaba kdew ba ka 21 tarik u Jylliew ka hap ha ka sngi U Blei bad ka ïahap bad ka sngi Father Day. Ka union ka la ong ba katei ka sngi ka dei ban dang long kaba aiti lut ha ka jingmane Khristan, ka jingiasyllok bad ki jinglehniam ha ka iing ka sem.
Kane ka jingpynroi la khmih lynti ba kan pynmih ïa ki jingïakren kiba kham jylliew ha kylleng ka Nagaland, ryngkat bad ki jingkynthoh na ki seng samla pule bad ki seng riewlum kiba lah ban long ha ki sngi ban wan.
Haba jubab halor katei ka kynrum kynram, u nongthoh ba pawnam jong ka Yoga, u Pranab Kumar Nath, u la ong ba ki tynrai jong ka Yoga ki don ka jingïadei kaba ym lah ban len bad ka saiñ pyrkhat Hindu bad ka Bhagavad Gita, hynrei u la ban jur ba ki jingmyntoi jong ka ki palat ïa ki pud jong ka niam.
“Ka Yoga ka don tynrai ha ka niam Hindu bad ka Bhagwad Gita.Hynrei ka dei na ka bynta ka jingsngewthuh kaba kham halor, ka jingkoit jingkhiah kaba khraw bad ka rukom im kaba ai jingmyntoi ia baroh,” la ong u Nath.
Kane ka mat ka la mih man ka por ha ki katto katne ki jylla jong ka thaiñ shatei lammihngi, ha kaba ki bynta jong ki seng Khristan ki la buh jingkylli ïa ka jingkyntiew ïa ka Yoga ha ki jaka pule, katba ki nongkyrshan ki pynskhem ba ïa ka Yoga ha kane ka juk mynta la leh nyngkong eh kum ka jinghikai jong ka koit ka khiah.
