Kohima, Naiwieng 08 : U Lat ka Jylla Nagaland La Ganesan bad ka BJP-Nagaland kala pynrem jur ia ka jingkren pynjah burom jong u Nongialam ka DMK RS Bharati, uba ong dang shen ba ki jaidbynriew Naga ki dei ki nongbam dohksew.
U Lat ula ong ba baroh ki dei ban kynmaw ba ka rukom bam ka dei ka mon jong u briew bad kam mut ba ka dei ka jing long u briew ne ka burom. Kumta, ym dei satia ban kynthoh pynrem halor kine kiei kiei.
“Ka Nagaland ka dei ka Jylla kaba riewspah ha ki jinglong tynrai, ha kaba baroh ki riewlum ki don la ki jong ki kolshor bad ki jingleh nala tynrai. Ban shu khein poh ia baroh ki briew tang namar ka rukom bam jong ki kam dei satia tang ka jingbym burom, hynrei ka lam ruh sha ka jingpynhiar kyrdan iala ka jong ka jinglong” ula ong.
U Lat ula ong ba ka jingialong jai jai kaba long mynta hapdeng ki paid Tamil bad ki Naga, la ka dei ha Nagaland lane ha Tamil Nadu, ka dei ka sakhi ia ka jingiabum markylliang hapdeng kine ki jaidbynriew iala ki jong ki jingleh nala tynrai.
Ka BJP ha Nagaland kala daw aba dei ban ai ka jingpynsajia kaba tyngeh ia u Bharati namar kane ka jingkynthoh pyrshah iaki Naga.
