Nagaland | Kyrpad ka Sorkar ia ka ENPO ban weng noh ia ka pakhang Shnong | Yn leit iakren u Rio sha Delhi halor ka FNTA

Kohima, Naitung 7: Ka sorkar Nagaland ha ka sngi Ba-ar ka la kyrpad ia ka Eastern Nagaland People’s Organization (ENPO) ba kan weng noh ia ka jingthmu pakhang shnong ha ka 10 tarik Naitung, haba pynpaw ba ka rai ban khot ia ka dorbar kyrpang jong ka iing dorbar thaw ain ka Jylla ka long ban pynlong ain ia ka Frontier Nagaland Territorial Authority (FNTA) kaba pyni ia ka jingaiti ban pyndep ia ki jingangnud jong ka thain.

Kane ka jingkyrpad ka la mih shen hadien ba ka Kynhun Myntri sorkar jong ka Jylla ka la rai ban pynlong ïa ka Dorbar ba kyrpang jong ka Ïing Dorbar Thawaiñ ka Jylla Nagaland ban wanrah ïa ka Bill na ka bynta ka FNTA ba la thmu, ka kynhun synshar lajong ne ka autonomous body na ka bynta ki hynriew tylli ki eastern districts jong ka Mon, Tuensang, Longleng, Kiphire, Noklak bad Shamator.

Ha ka jingialang kyrkieh bad ka Eastern Nagaland Legislators’ Union (ENLU) bad ki heh ophisar, ka kynhun myntri ka la rai ban iaid shakhmat da ki ain ki ban ai ia ka FNTA ia ka bor thaw ain, pyntreikam bad financial powers halor ki sobjek ba la kdew ba la pynkylla sha ka Bor synshar.

Ka sorkar ka la ong ba ia kane ka Bill yn sa shna da ka jingiasyllok bad ka Union Ministry of Home Affairs bad kan iahap pura bad ka riti synshar ka ri.Ka la pynpaw ruh ba ki jingïada katkum ka Article 371(A) kin dang sah kumjuh.

Haba kyntu ia ka ENPO ban pynsangeh noh ia ka jingthmu jong ka ban iakhih, ka sorkar ka la ong ba ka dorbar kyrpang jong ka iing dorbar ka dei ka sienjam kaba skhem katkum ka riti synshar ban pynurlong ia ki jingdawa jong ka Eastern Nagaland.

Ban pynsted ia ka jingtreikam, ka kynhun jong ka sorkar jylla ba la ialam da u Myntri Rangbah ka jylla u Neiphiu Rio kan leit sha New Delhi na ka bynta ban iakren bad ka Centre halor ka FNTA, kynthup ia ka rukom pyniaid pisa bad ki kyndon ai pisa jong ka.

Ka ENPO ka la thmu nyngkong ia kane ka jingiakhih ha ka 7 tarik u Naitung hynrei ka la pynjlan noh sha ka 10 tarik u Naitung khnang ban lait na ka jingiatyngkhuh bad ka tamasa Tuluni. Ka seng ka la pynbna ia ka jingkhang dam kaba jai jai naduh mynstep haduh mynmiet ha kylleng jong ki hynriew tylli ka eastern district.

Ka ENPO ka la pynneh ba ka jingdawa jong ka, ka long halor ka jingpyntreikam pura ïa ka Memorandum of Agreement (MoA) ba la ïasoi ha ka 5 tarik u Rymphang hapdeng ka ENPO, ka Sorkar India bad ka Sorkar Nagaland. Ka la kynnoh ia ka sorkar jylla ba ka pyrshang ban pynduna ia ki kyndon kiba iadei bad ka jingsynshar hi ha ka liang ka pisa tyngka bad ka bor pyniaid na ka bynta ka Bor ba la tyrwa, da kaba kyntait ba ia ka jingiateh dei ban pyntreikam pura.

Lada pynlong ain, ka FNTA Bill kan long ka sienjam kaba nyngkong eh ban thaw ia ka autonomous territorial authority na ka bynta ka Eastern Nagaland, kaba don ia ka bor halor ki bynta kum ka pule puthi, ka koit ka khiah, ka roi ka par ha nongkyndong bad ki jingtei, katba ka ain bad ka jaka kan sah hapoh ka Sorkar Jylla katkum ka Article 371 (A).

Da kaba dang buh por ban khang dam ha ka 10 tarik u Jylliew, mynta ka jingpyrkhat ka la long hato ka ENPO kan pdiang ïa ka jingkyrpad jong ka sorkar ne kan ïaid shakhmat bad ka jingïakhih katba ka jingïakren ka dang ïaid shakhmat.