Shillong, Naitung23 : Ka Shillong Sports Association kaba pyniaid ia ka Shillong Premier League, ka la pynbna ba ka kylla kaba ar jong ka lympung ialehkai ba shongshit tam ha ka jylla kan sdang biang naduh ka 03tarik Nailar da ka jingiakhun hapdeng ka lahduh barim, kata ka Shillong Lajong bad kynhun ba wan ba ar ha ka snem 2019, ka Rangdajied United FC.
Ka kylla kaba nyngkong jong katei ka lympung la buh ban pynkut ha ka 27tarik Naitung ha kaba ka Mawlai SC ka la ioh ban lamkhmat ha ka miej ia khein point.
Ka jaka ban pynlong ia ka kylla kaba ar kan long beit hajuh kata, ka madan MFA, Third Ground, Polo ha kajuh ka por, kata ha ka por 4:00 baje haduh ka 27tarik Nailar. Hynrei naduh ka jingiakhun kaban wan, kata naduh ka 01tarik Nailur ka jingiakhun kan sdang noh naduh ka por 3:45 baje janmiet.
Ia katei ka lympung ialehkai yn pynkutnoh ha ka 24tarik Nailur da ka jingiakhun hapdeng ka Langsning bad Mawlai. Kumba long mynta ka Langsning ka don ha ka kyrdan kaba ar hadien ka Mawlai ha ka miej ia khein point.
Lada bud beit na kaei kaba leh ha u 2019, kan ym don satia kano kano ka jingiakhun knockout lane final hynrei ka klob kaba wan ha khliehduh jong ka miej ia kheiñ point hadien baroh ar tylli ki kylla kan ioh ban rah ia ka nam lahduh jong SPL.
