Nongstoin, Naitung 26: Hadien ka jingwad ba khlem shongthait, ki Pulit ka Nongstoin Police Station, kila lap hynne ka miet ia ki arngut ki heprit shynrang ba dang 11 snem ka rta, kiba jah rngai na Tiehsaw.
Kine ki arngut ki heprit ki kyrteng u Aibantei L. Marsiangbai, khun u Bah Lubelti Sohshang bad u heprit Hamebatskhem Marwein khun u Bah P Hoojon.
Kat kum ka khubor Pulit, ia kine ki khynnah la lap da ka kynhun ki Pulit na Sohpian.
Kine ki heprit kiba dei shiparalok, kila mih leit mareh step hynne ka step phyrngap por 4:30 baje eiei bad ki khlem wan phai iing shuh.
Ia kine ki khynnah la ialam sha hospital ban phah khmih ha ki doktor hashuwa ban aiti sha ki bahaiing. Ka jingtohkit ruh kala iaid shakhmat halor kane ka jingjah rngai jong ki.
