Shillong, Risaw 09: Uwei u khynnah ba dang hynniew snem ka rta ia uba la tip kyrteng kum u Kyrshanbor Kharmudai uba la jah klep ha ka janmiet jong ka 8 tarik u Risaw na Lummarboh Block-4, Nongrah, Shillong la lap noh mynta ka sngi ia ka met iap jong u narud surok ka khlaw Mawpat.
Ia ka met jong une u khynnah la lap na kawei ka jaka ba la tip kum ka Lum Rumnong hynne ka sngi Palei, kaba don harud surok marjan bad ka khlaw Mawpat ka ban poi sha NEIGRIHMS.
Halor ka jingjah une u khynnah, ki Pulit ka Rynjah Police Station kila pynlong ia ka jingwad bniah baroh shimiet ryngkat bad ki bor shnong bad ki paidbah nong shong shnong.
Ki Pulit kila pynlong mardor ia ka jingtohkit halor kane ka jingiap une u heprit bad kane mynta ka dang iaid shakhmat bad ia katei ka jaka kaba la lap ia ka metiap jong une u heprit la kerkut noh katba ka tnad Forensic ka dang lum ia ki sabut kiba don ha katei ka jaka ban lap ia ki daw tynrai halor ka jingiap jong u Kyrshanbor.
Ki pulit kila pyntip ruh sha ki bahaiing bahasem halor ka jinglap ia kawei metiap jong u khynnah bad ki bahaiing bahasem haba kila wan peit kila pait dohnud ban iohi ba kadei ka metiap jong u baieid bathoin u jongki u Kyrshanbor Kharmudai.
Katkum ki khubor, la iathuh ba ia une u khynnah la iohi khatduh ha ka por 4 janmiet ha ka sngi Balang ha shwa ba un jah noh na katei ka dong.
