Shillong, Naitung 09 : Ka sur rwai kaba thiang jong u samla na shnong Kynshi, Eastern West Khasi Hills kala pynkhreh ban rah ia ka nam ka Meghalaya ha ki rynsan ka pyrthei.
U samla Kitkupar Nongsiej, uba jop ia ka “Ka Sur Kynud Season-3, un mihkhmat ia ka India sha ka World Championship of Performing Arts ha Las Vegas, USA, ka ban long naduh ka 13 tarik Naitung haduh ka 21 tarik Naitung 2026.
Ka Don Bosco Youth Centre bad ka Don Bosci Media Network kila pynlong ia ka jingiaseng duwai bad ka jingkitbok ia une u Samla ha ka janmiet sngi Ba-ar ha DBMN TV Studio, kaba don ha Laitumkhrah.
Ki Nongialam Balang, ki Bahaiing hasem bad ki paralok parajor kila ialum lang ban kyrkhu ia une u nongrwai u ban sa mih na Jylla ha ka 10 tarik Naitung. Ia kane ka jingiaseng duwai la pyniaid da u Rev. Fr. Michael Makri, SDB, Director ka DBYC bad Managing Director of DBMN, bad u Shillong Salesian Provincial Rev. Fr. John Zosiama ula wan iadonlang kum u kongsan.
U Kitkupar un leit sha Las Vegas bad la u kpa, Bah Aibari Kupar Syiemlieh. Ia kane ka jingleit la thmu nyngkong ha u snem bala lah hynrei la pynjlan noh namar ki jinglong jingman ha ka pyrthei.
Une u samla ba 21 snem ula paw nam hadien ka jingjop ia ka “Ka Sur Kynud Season-3, ha kaba ula ioh pdiang ia ka song pisa ba T.1 lak n aka Deputy Commissioner ka East Khasi Hills Kong RM Kurbah.
Hashuwa kane, ula jop ruh ia ka Sur Kynud Niam season-2.
U Kitkupar uba dei u dkhot ka Shillong Chamber Choir, u dei uba la rwai ia ki jingrwai tynrai u Khasi ha Doordarshan bad iashimbynta ha ka International Exposure Programme ha Indonesia ha u 2025 bala bei tyngka da ka Tnad Sport & Youth Affairs ka Jylla.
Ka jingshah jied jong u sha ka WCOPA, ba ju khot kum ka “Olympics of Performing Arts” kala wan hadien ba ula pyndep ia ka Online audition.
Palat 60 tylli ki Ri kin iashimbynta ha ka WCOPA. Kane kan dei ka sien kaba ar ba ki nongjop ka Sur Kynud kin mihkhmat ia ka India shabar ka Ri.
Kaba nyngkong, ka samla Chevinia Lyngdoh Mawnai, kala jop ia ka UK Vocal Star Competition da ka jingkyrshan ka DBMN.
