Shillong, Naitung 9: Ka Meghalaya kala lah ban dep ban sam haduh 61 percent ki enumeraton form sha ki nongthep vote hapoh jong ka Special Intensive Revision 2026, ha ka jingleit rung ha man la ki iing ban pynshisha ia ki nongthep vote ha baroh 12 tylli ki district jong ka jylla.
Katkum ka kaiphod kaba la pynmih da u Chief Electoral Officer ha ka sngi Palei, la dep ban sam haduh 14,43,818 tylli ki phom na ka jingdon baroh 23,49,645 ngut ki nongthep vote kaba kynjoh sha ka 61.45 percent.
Kiba dang sah 9,05,827 ngut ki nongthep vote ne 38.55 percent, kin dang ioh pdiang ia ki phom jongki.
Ia kane ka sienjam la leh da ki 3,551 ngut ki Booth Level Officers, ha kaba man la uwei pa uwe u BLO yn khmih haduh 407 tylli ki phom.
Ka jingdon ki nongthep vote na ka bynta ka jingkhmih man la u BLO ha ka jylla kan kynjoh ia ka 661.69.
Ka jingai ia ki phom lyngba ka kor Digital ka lah sdang, ha kaba 1,98,307 EF ne 8.44 percent na ki jingdon baroh ki nongthep vote kidei kiba lah dep pynrung kyrteng ha katei ka rukom treikam.
Ka jinglong jingman ha ki District kala pyni ia ka jingiapher na kawei sha kawei pat bad kane ka kam kadei kaba dang iaid shakhmat.
Ka South West Garo Hills kadei kaba la wan hakhmat eh, ha kaba 88.36 percent na ki 1,08,883 ngut ki nongthep vote kidei kiba lah dep ban shimkhia, kaba la bud pat da ka North Garo Hills kaba la kot ia ka 77.96 percent bad West Jaintia Hills kaba la kot ia ka 72.16 percent.
Ka East Garo Hills bad Ri-Bhoi kila jam ia ka palat ia ka 67 percent.
Ka East Jaintia Hills kadei kaba la duna tam kaba la kynjoh tang 42.87 percent, ha kaba 44,764 ngut na ka 1,04,417 ngut ki nongthep vote kidei kiba lah iohpdiang ia ki phom.
Ka East Khasi Hills, kaba dei ka district kaba heh tam ha ka jylla kaba don 6,32,146 ngut ki nongthep vote kala kynjoh ia ka 53 percent ka jingpyndep, katba ka West Garo Hills kala kynjoh sha ka 56.32 percent.
Kiwei ki district kiba kynthup ia ka South Garo Hills, Eastern West Khasi Hills, South West Khasi Hills bad West Khasi Hills kila don hapdeng jong ka 58 bad 63 percent.
Ka kaiphod kala pyni ruh ia ka jingiapher ha ka jingpynrung kyrteng lyngba ka kor Digital.
Ka South West Khasi Hills kala lamkhmat da 17.88 percent ha ka jingshim ia ki phom lyngba ka kor digital, bud pat ka Eastern West Khasi Hills kaba la kynjoh sha 16.66 percent bad South Garo Hills kaba la kynjoh 15.08 percent. Ka West Jaintia Hills kadei kaba duna tam kaba la kynjoh tang 1.92 percent.
Ka North Garo Hills kadei kaba ka kam kaba la khia tam ia ki BLO ha kaba kila khmih haduh 816.75 ngut ki nongthep vote, katba ka South West Khasi Hills kadei kaba dun tam kaba long 563.58.
Ki BLO jongka South West Garo Hills kidei kiba la sam bun eh ia ki phom kaba long 573 tylli, katba ka East Jaintia Hills kadei kaba duna tam ha kaba man la ki BLO ki sam 285 tylli ki phom.
Ka Special Intensive Revision kadei shi bynta jong ka sienjam ka Election Commission of India ban pynbeit bad pynjanai ia ka thup kyrteng ki nongthep vote hashwa ban pynlong ia ka elekshon kaban sa wan.
U CEO ula kyntu ia ki nongshong shnong ban ai ka jingiatreilang bad ki BLO ha ka jingpyniaid shakhmat ia ki kam ban pynshisha bad la buh ruh ia ka ECINET bad Voter Helpline Mobile Applications ban khmih ia ki jingtip bad ia ka jinglong jingman.
