Nongpoh, K’lyngkot 10 : U Chief Executive Member (CEM) barim ka Khasi Hills Autonomous District Council (KHADC) Bah Cleophas B. Syiem, ula kynthih diengkper mynta sa sha ka seng Bharatiya Janata Party (BJP) hadien ka jingkynthih diengkper na ka Congress sha ka NPP, na ka NPP sha ka UDP.
Une u MDC barim ka Nongpoh, ula leit ban pyniasoh ialade lem bad ki Nongkyrshan sha ka BJP kaba la pdiang sngewbha ia u ha ka jingialang ba long hynne ka sngi ha Nongpoh.
Ia u Bah Cleophas bad ki Nongkyrshan jong u, la pdiang sngewbha sha ka BJP da ki Nongialam ka BJP ba khmih ia ka Ri-Bhoi kiba kynthup ia u Incharge ka Ri-Bhoi bad B Suting, u State Vice President Dr Everist Myrsing uba dei ruh u kyrtong ka Mawhati Constituency lem bad kiwei kiwei.
Haba ai jingkren, u Bah C.B. Syiem u la ong ba u sngewkmen ban pyniasoh ialade sha ka party BJP kaba dei kawei na ki party sainhima kaba la lah shisha ban wanrah shibun ki jingkylla khamtam ha ka liang ka roi ka par bad kiwei kiwei kiba ki paidbah ki angnud bad thrang ban iohi ia ka jingkylla.
U la iathuh ruh, ba ka nongrim hi kaba la pynlong ia u ban mih noh na ka party UDP, ka long ba ka UDP bad ka party NPP hi ki dei ki party kiba la shet shukor ia u paidbah ym tang ha ka jylla Meghalaya hynrei wat ia ka Nongpoh Konstituensi ha ki liang baroh bad kaba kham kongsan ka long ruh ba ha kine ki party kam don satia kano kano ka jingkhein kor ia ki nongialam ka party bad ruh ba kim khein snep ia u paidbah.
“Nga la sdang ia ka kam sain hima bad ka party Congress ha u snem 2002 namar nga burom ia u Maheh Dr. DD Lapang u ba dei u wei na ki nongialam ba radbah ka jylla hynrei hadien ba u Dr. Mukul Sangma Myntri Rangbah barim um shem la burom satia ia u Maheh bad ka jingbym lah ban pynurlong ia shibun ki kam pynroi ha Nongpoh, hadien ka jingmih noh u Maheh nga ruh nga la mih lang na ka Congress ha u snem 2017 ban leit iasoh sha ka party NPP da ka jingkyrmen ba kane ka party kan ai ka jingsynshar kaba khuid bad ka lah ban pynurlong ia shibun ki project kiba dang sahteng na ka bynta ka Nongpoh Konstituensi hynrei hangne ruh la jia kumjuh la don ka jingbym burom ia ki nongialam bad wat ka jingnang pynsahteng ia ki project bapher bapher kiban pynmyntoi ia u paidbah bad nga la mih noh na ka NPP ban pyniasoh sha ka UDP hynrei hangne ruh nga la shem ba kine ki party kim long kiba bit ban synshar paidbah”, ong u Bah CB Syiem.
