Nongstoiñ, Nailar 4: Ka Maitshaphrang Career Guidance ba la pynlong da Khasi Students Union-Nongstoiñ Circle lyngba ka Education Cell, ka la poi sha kaba kut ha ka sngi saitjaiñ, ha kaba palat spah ngut ki samla pule bad ki khynnah skul ki la ïoh ïa ki jingmyntoi.
Kane ka prokram la pynlong ha ki lai tylli ki sngi saitjaiñ kata ha ka 20 tarik u Naitung, 27 tarik u Naitung bad 3 tarik u Nailar. Ka jingthmu jong kane ka program ka long na ka bynta ban pynkup ïa ki samla pule da ki jingshemphang kiba kordor, ba kin sngewthuh shai hashwa ba kin jied ïa ki laiñ jingpule bapher bapher.
Kumba shispah ngut ki samla pule ki la ïashim bynta ha kane ka prokram, kaba la wan ai jinghikai da ki riew shemphang (Resource Person) na ki tnad bad kyrdan bapher bapher.
Ki Resource Person ki la ai ïa ki samla pule ïa ka jingpyn sngewthuh kaba bniah shaphang ki laiñ bad ki tnad pule bapher bapher bad kumjuh ruh ki sien jam kiba donkam ban leh.
Ka Khasi Students Union Nongstoiñ Circle, kan dang ïai bteng ban ai bor ïa ki samla da ka jingnang jingstad, khnang ba ki samla pule kin tyngshaiñ ha ki kam ba ki la jied ban pule.
Kane ka prokram ka dei shi bynta na ki jingpyrshang jong ka seng ban kyntiew ïa ki samla pule ka thaiñ, kiba dang ïaid shakhmat, ba kin ïoh ka jingnang jingstad ba paka, ba kin nang lah ban ngam kham jylliew ha kane ka bynta, khnang ba ki lah ban rah sha jrong ïa ka kyrdan jong ka pule puthi bad ruh ha ka imlang sahlang.
