Shillong, Nailur 03: Ka Shillong Medical College (SMC) kala pynkhreh ban sdang noh ia ka jingai jinghikai ha ka taiew ba khatduh mynta u bnai hadien ka jingioh ia ka jingbit bad ia ka Letter Of permission (LOP) na ka National Medical Commission (NMC).
Ia kane la pynbna da ka Myntri ka Koit ka Khiah ka Kong Ampareen Lyngdoh hynne ka sngi Balang da kaba ong, “Mynta ka sngi kadei ka sngi kaba kmen ia ka tnad ka koit ka khiah bad kumjuh ia ka sorkar Meghalaya namar ngi lah ioh pdiang ia ka Letter Of Permission na ka NMC kaba la kynthup ia ka SMC kum kawei na ki college kaba la ioh ia ka jingmynjur ban sdang treikam noh ia ka samoi pule jong u snem 2025-26 na ka bynta 50 ngut ki samla pule”.
“Ngi mynta ngi dang pynkhreh ban sdang noh ia ka jinghikai. Ngi la pynkhreh ban sdang noh ha ka taiew ba khatduh jong u Nailur. Kane kadei ka por kaba la buh ha ka ri India baroh kawei na ka bynta kito ki samla kiba la pyndep ia ka NEET. Ngi dap ruh da ka jingkmen ban pyntip ba ki samla pule kiba don ia ka jingangnud bad kiba la pyndep ki lah ban aplai na ka bynta ban ioh pule MBBS katkum ka jingbhah ia ka Meghalaya ha ryngkat bad ka jingiasyllok bad ka SMC,” kala ong bad ka pyntip ba ka wat baar jong ka jingiasyllok na ka bynta ka Seat MBBS kan sdang ha ka 26 tarik u Nailur.
Da kane ka jinglong jingman, ka Meghalaya mynta kala ioh baroh 144 tylli ki seat pule MBBS, kaba kynthup ia 50 tylli ha SMC bad 94 tylli ki seat kiba la mang ha kiwei pat ki jaka pule kiba don Shabar ka jylla kum ka NEIGRIHMS bad RIIMS.
“Ka jingdonm baroh jong ki seat ha ka SMC ka long 50. Hynrei ngi dap ruh da ka jingkmen ban pyntip ba ka Meghalaya kan bteng ban ioh ia ka bhah na ka sorkar. Kila don 94 tylli ki Seat kiba la bhah ia ka Meghalaya ha ki jaka pule bapher bapher kum ka NEIGRIHMS, RIIMS, Imphal,” la ong ka Kong Lyngdoh.
Kala ong ba kane kan wanrah ia ka jingkylla kaba khraw ia ka jylla Meghalaya, ka myntri kala ong, “Ki samla pule ki jong ngi kiba don jingthrang ban pule ia ka MBBS kila don ia ki kabu kiba biang bha. Hooid, kaba kham kongsan ia ki samla pule ki jong ngi ka long ba kin hap ban treikam hapoh jong ka jylla Meghalaya kumta kan long ka jingiarap ha kaban weng ia ka jingduna jong ka jingdon ki doctor ha ki jaka ai jingsumar jong ka sorkar hapoh ka jylla”.
Ka Kong Lyngdoh kala pyntip ba ka SMC kadei ka “brown field project” bad kan pyndonkam ia ki hospital kiba la don lypa kum ka Shillong Civil Hospital bad Ganesh Das Hospital, kum ki hospital ban ai jinghikai, ban weng ia ka jingdonkam ban tei ia ka hospital kiba thymmai.
Ka college ka don ia ka jingthmu ban sdang ia ka Specialization Courses ha ki snem ban wan, ban ai ia ka kabu ban kiew ha ka kam kum ki doctor ha ka jingai jingshakri ia ka sorkar.
Ka Kong Lyngdoh kala ong ba ka wat baar jong ka jingiasyllok na ka bynta ka MBBS seat kan long ha ka 26 tarik u Nailur 2025. Kane ka jingiasyllok kan kynthup kan kynthup na ka bynta baroh ki Medical Seat kiba la bhah da ka sorkar India na ka bynta ka jylla Meghalaya.
Ka Kong Lyngdoh kala pynpaw ruh ia ka jingskhem jingmut ba ka college kan lah ban ai iaka jinghikai kaba bha tam ha ka liang ka koit ka khiah hynrei kan shim por pat ban poi sha ki kyrdan kiba hakhmat, ka SMC ka iengskhem ha kaban pynthikna ban ai ia ka jinghikai bad ka jingsumar ia ki nongpang.
Ka SMC kala pynkhreh ban sdang da katto katne ngut ki nonghikai, ka Kong Lyngdoh kala ong ba kila don 8 ngut na ki 16 ngut ki Professor kiba donkam, 17 ngut na ki 20 ngut ki Associate Professors, 21 ngut na ka 23 ngut ki Senior Residents bad 12 ngut na ka 15 ngut ki Tutor bad Demonstrators bad baroh 25 ngut ki Assistant Professor kiba donkam kila don.
Ka Myntri kala pynpaw ba kane ka jingduna namar ka jingeh ban khring ia ki Professor sha ka jylla kum ka Meghalaya bad kala banjur ia ka jingdonkam ban don ia ka jingsiew kaba heh bad ban pynbiang ia ki jingdonkam.
“Ngin sa iaid shakhmat na ka bynta ban pynkhlain ia ki jingduna kiba dang sah. Ia ka jylla kaba kum ka Meghalaya, ka Shillong kam dei satia ka jaka kaba don sha jngai bah, ka long kaba eh ban pynbiang ia baroh kitei ki post namar ba ngi hap ban don ka jingsiew kaba heh bad ka jingpynbiang ia ki jingdonkam kiba bun ia ki professor” kala ong bad ka bynrap “Kumta ban wanrah ia ki kadei ka jingtynjuh kaba khraw bad dei halor kane ba ngi sngewnguh bha ia ka kynhun jong ki ophisar bad ka jingtuklar jong u Myntri Rangbah ban pynthikna ba kin don ia ki jingdonkam kiba kongsan ha ka kam ai jinghikai ha ka khyllipmat kaba nyngkong”.
Ka Myntri kala pynithuh ruh ia ka Dr. Nicola Gracyl Lyngdoh Iangrai, ENT Surgeon kaba la shemphang bha na ka RIIMS, kum ka Director jongka Shillong Medical College. Ka Dr Iangrai kala pynpaw ia ka jingkloi ka jongka ban shakri ia ka jylla bad ban noh synniang ban pynlong ia ka medical college kaba jop.
Ka Myntri kala pynthikna ba ka ‘Medical Seat’ kaba la bhah da ka sorkar India yn ym pynduh noh mardor, namar katto katne ki seat ki lah ban dei shi bynta jong ka bhah jong ka jylla.
Halor ka jingkylli, ka Myntri kala pynshai ba ka Tura Medical College kadei da kawei pat ka sobjek, ka ‘greenfield project’ kaba donkam ia ka iing building bad ia ki tiar ki tar kiba thymmai, ym kum ka SMC kaba dei ka ‘brownfield project’ kaban pyndonkam da ki hospital kiba la don lypa.
Ka Myntri kala pyntip ba u Myntri Rangbah u dang iakren bad u Myntri Rangbahduh ka ri u Narendra Modi ban plie ia kane ka Medical College kaba nyngkong eh hapoh ka jylla.
Ka jingsiew kaba shi snem ba la buh kan long T.30,000.
“Ngi lah buh ha ka dor kaba rit bha kaba T.30,000 kynthup ia ka bai Hostel kaba man la ka snem” kala bynrap.
 kala pynkhreh ban sdang noh ia ka jingai jinghikai ha ka taiew ba khatduh mynta u bnai hadien ka jingioh ia ka jingbit bad ia ka Letter Of permission (LOP) na ka National Medical Commission (NMC).){kind=link}