Shillong, Nailur 03: Ka kynhun ialehkai football ki kynthei ka Meghalaya kala mih na ka nongbah Shillong hynne ka sngi ban leit sha West Bengal ban iashimbynta ha ka Senior Women’s National Football Championship 2025-26.
ka Meghalaya kala hap ha ka Group D kaba kynthup ia ka Railways, Sikkim bad ka West Bengal kaba pynlong ia katei ka jingiakob.
ia kane ka kynhun kaba don 20 ngut ki nongialehkai la jied da ka Meghalaya Football Association kaba kynthup ia ki nongialehkai kiba thymmai bad ki nongialehkai kiba la mihkhmat teng ia ka jylla.
Kawei na ki nongialehkai kaba pawkhmat kaban mihkhmat ia ka Meghalaya kadei ka nongapkol ne goalkeeper ka Ribansi Jamu kaba dang shen kadei kaba donbynta lang ha ka kynhun jong ka ri India kaba la ioh rung sha ka AFC U-20 Women’s Asian Cup, watla kam shim la ioh ban mih madan ban ialehkai, hynrei kala ai jingkyrshan pat ia la ka kynhun ialehkai.
Ki nongialehkai kiba la mihkhmat teng bad kiba la don ia ka jingshemphang ki kynthup ia ka Makrisha Songthiang, Nisilia Majaw bad ki nongialehkai kiba dang khynnah kiba kynthup ia ka Eiladki Ksoo bad Inrilaidor Khongthaw.
Ka Meghalaya kan iakhun nyngkong eh pyrshah ia ka West Bengal ha ka 6 tarik u Nailur bad hadien kane kan iakhun pyrshah ia ka Sikkim ha ka 8 tarik u Nailur bad ia ka Railways ha ka 10 tarik u Nailur.
Ka kynhun ki nongialehkai ka Meghalaya ka kynthup ia ka Ribansi Jamu, Banrisha Wahlang, Darishisha Kharlyngdoh, Saralin Warlarpih, Judith Kharmuti, Baiahunshisha L Nongbri, Ibadarihun Nongsiej, Badarishisha Kharumnuid, Bahunlang Synrem, Ibakordor Wahlang, Makrisha Songthiang, Cathrine Kharkongor, Marbarin Nongrum, Nisilia Majaw, Inrilaidor Khongthaw, Iaphisha Marbaniang, Eiladki Ksoo, Ribahunshisha Kharshiing, Iaraplang Nongrum bad ka Ibashembha Khongsit.
U Bah Kitboklang Kharkongor (head coach), Haphilabet Kharkongor (assistant coach), Ibashisha Khongwet (manager) bad Monaliza Don (physio).
