Shillong, Naitung 05: Ka Draupadi Murmu kan iakynduh mynta ka sngi balang ia baroh ki MLA ka Jylla Meghalaya ha Orchid Lake Resort, Umiam ban pan ia ka jingkyrshan ba kan ioh ia ka jingjop ha ka elekshon President ka Ri ka ban long ha ka 18 tarik mynta u bnai.
Ka Draupadi kaba dei ka kyrtong jong ka Sorkar National Democratic Alliance (NDA) ba ialam da ka BJP kan ai jingkren ia baroh ki MLA ka Jylla ha kane ka jingiakynduh.
Haba pyntip ia kane hynne ka sngi ba-ar, u National Executive Member ka BJP bad In-charge ka Elekshon President Bah A.LHek ula kyntu ia baroh ki MLA ba kin bat ia ka jingsngew iapher party bad ban ai ka jingkyrshan ia kane ka longkmie ba nyngkong eh na ki paid riewlum kum ka kyrtong President ka Ri.
Dei halor kane, u ong ba ka NDA kala tyrwa ia ka kyrteng ka Draupadi Murmu, ka lat barim jong ka Jylla Jharkhand ban long ka kyrtong sha ka elekshon President na ka NDA.
“Kan dei ka jingsarong bad ka burom kaba khraw ia ngi baroh ban ioh da ka Jaidbynriew Riewlum ka ban bat ia ka kyrdan ba hakhlieh duh ka Riti Synshar ka Ri kum ka President ka Ri India” ong u Bah Hek.
