Nongpoh, Rymphang 19 : Uwei u Khynnah skul ula iap bad hynniew ngut ki kiwei pat kila mynsaw jur haba ka bod skul ba ki iashong, kala shah tynrah nadien ha kawei ka trok kit clinker. Kane kala jia hynne ka sngi Palei ha ka por 8 baje mynstep hajan Byrnihat.
Kine ki Khynnah skul ki dei jong ka skul Mount Xion Secondary School, kaba don ha 15 mer, Byrnihat.
Kat kum ka khubor, kane ka bos skul ML10-D-5047 ka dang ap ban kit ia ki khynnah skul ha 17 mer ha ka por ba ka shah tynrah ha ka trok NL01-AA-4672. La iathuh ba u nongniah bad u nongbud jong kane ka trok, kila phet krad na katei ka jaka.
Une u Khynnah skul ba khlad u dei uba tip kyrteng u Maxwell Lyngdoh ba shong ba sah ha 19 Mile, Ri-Bhoi. Une u Khynnah ula khlad na ka jingmynsaw ha Arhi Hospital, Jorabat.
Haduh 20 ngut ki Khynnah skul ki don ha kane ka bos ha ka por ba jia kane ka jingjia. Ia kiba mynsaw la pynkit mar mar sha ki hospital kiba don marjan ka thain.
Ki Pulit ka Byrnihat Police Outpost haba ioh jingtip ia kane ka jingjia, kila leit mar mar ban tohkitbad ban leh ia kaba donkam.
