Shillong, Rymphang 19 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ula pyntip ha Iingdorbar ha ka sngi Palei, ba palat 96% ka jingsiew bai jaka jong ka project Shillong Western Bypass lah dep ban siew bad kular ban sa pynbeit noh ia kiwei pat kiba dang sah bad ki trai jaka.
“Haba iadei hi bad ka Western Bypass, ka jingtei ia ka project kala iaid bha bad ka kam ba iadei bad ka jingsiew bai jaka-96-97%-lah dei ban pynbeit” ong u Bah Prestone.
“Lehse u Dkhot na Sohra ula kdew ia ka kam kaba ngi dang don ka jingiapynbeit-3-4%- ka bym pat lah pynbeit haduh mynta bad kadang don hapoh ka jingbishar u District Collector. Ai ba ngan kular ia ka Iing ba kia kine ki kam yn sa pynbeit noh bad kan ym ktah satia ia ka bha ka miat jong ki trai jaka- hynrei, kin sa ioh jingmyntoi pynban ynda ka Sorkar kala siew ia ka bai lutksan” ula kular.
Shuwa kane, u MLA ka UDP na Sohiong Synshar Kupar Lyngdoh Thabah, ula pynpaw ia ka jingsngewkhia halor ka jingtih ia ka khyndew sha palat u pud ka jaka ka Revenue ha kaba ka khyndew kala pynjulor ia ki lyngkha kba ha ka por ba pyntrei iaka surok.
Ula kylli ia kaei kaba ka Sorkar, ka Tnad Revenue, lane NHIDLC kan leh ia kane ka jaka thylli lane ka jaka ba khlem pat siew.
Haba jubab, u Bah Prestone ula ong ba ia kane ka kam yn sa shong bishar bad sa pynbeit.
