Shillong, Nailar 24 : Wat hapdeng ka jingiatynjuh bor hapdeng ki Pulit bad ki kynhun Sengbhalang ka East Jaintia Hills, ka public hearing ha shnong Lumshnong halor ka jingtyrwa ban pynheh ia ka M/s Meghalaya Cement Ltd (Topcem) ka long kaba jop.
Ki paidbhur na Narpuh Eleka kila thombor ia ka Community Hall jong ka Topcem bala pynlong ia ka public hearing, kaba lam sha ka jingmynsaw jong ki katto katne ki nongiakhih bad ki Pulit. Ki sengbhalang ba kynthup ia ka HANM, KSU-Narpuh Circle bad kiwe kiwei ki dei shibynta jong ka kynhun iakhih ha Thangskai ban pyrshah ia ka Environmental Public Hearing bala pynlong da ka Meghalaya State Pollution Control Board.
Ban tehlakam ia ki paidbhur, ki Pulit kila hap ban siat ia ki tyndong lyer pynsat khmat bad bom lathi ia ki nongiakhih.
Ia kane ka public hearing la pynlong kum shibynta ban ioh jingkyrshan na ki trai shnong ha kaban pynheh ia ka Meghalaya Cement Limited (Topcem) ba kan pynmih ia ka mar naka 2600 ton shisngi sha ka 4500 ton shi sngi.
Wat hapdeng ka jingpyrshah shabar ka hall, kane ka public hearing kala ai ka jingmynjur ia ka jingtyrwa. Napdeng kiba kyrshan ki kynthup ia ki Waheh Chnong jong ki lai tylli ki shnong kiba hap hapoh ka Narpuh Eaka- ka Wahiajer, Thangskai bad Chiehruphi.
Ki Nongiakhih kila kam ba kam shym don satia ka lad aikam aijam lane ka kam pynroi bala wanrah da kine ki karkhana dew bilat nalor ba kala wanrah ia ka jingpynjaboh ia ka mariang bad ka jingpang ia ki briew.
Hynrei, kiwei ki nongshongshnong ka Narpuh kim mynjur satia ia kane haba ong ba ka lad aikam kala nang kiew bad ka Topcem kala wanrah ia shibun ki kam pynroi ha ki shnong ki thaw.
U Senior vice president ka Meghalaya Cements Limited (Topcem), Vikash Saraf, ula pynpaw ba ki don tang katto katne ki briew na ki shnong kiba marjan kiba don ia ka jingthmu ha lyndet, ban thaw ia ka jingkular bad ban pyuhnpaw sha ka pyrthei ba ki briew ki pyrshah ia ka project.
“Baroh ki kyrshan ia ka Topcem namar ngi kyrshan ia ki ha ki jingdonkam baroh. Ngi la pynshna bun ki surok ia ki, ngi la ai ia ki streetlight, ngi la pynshna ia ki Iingmane, ngi la ai bun ki kam ki jam….ngi la ioh NoC na baroh ki shnong ba marjan. Ngo la don ia ka NoC na ka Elaka, ngi la don ka NoC na u Daloi ruh. Ki trai shnong hi kila kyrshan ia ngi” ula ong.
Pule lang ia kane: Hap siat tear gas bad khyrwit lathi ki Pulit ha EJH ha ka public hearing ban pynheh ia ka M/s Meghalaya Cement
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
 ba kan pynmih ia ka mar naka 2600 ton shisngi sha ka 4500 ton shi sngi.){kind=link}