New Delhi, Nailur 19: Ka kynhun Myntri jong ka Sorkar NDA ha ka sngi Nyngkong, kala ai ka jingmynjur ia ka Women’s Reservation Bill. Kane kala jia ruh hadien ka sngi shong dorbar ba nyngkong jong ka Dorbar Kyrpang ka Parliament, ka ban long 5 sngi lynter.
Kiba la wan iashimbynta ha kane ka jingialang ki kynthup ia u Amit Shah, Rajnath Singh, Piyush Goyal, S Jaishankar, Nirmala Sitharaman, Pralhad Joshi, Dharmendra Pradhan, Nitin Gadkari bad Arjun Ram Meghwal.
Ka Kynhun Myntri kala mynjur ruh ban wanrah noh ia kane ka Women’s Reservation Bill hapoh ka Iingdorbar.
Kane ka Women’s Reservation Bill bala mynjur da ka Rajya Sabha ha u snem 2010, ka don ia ki kyndon ban ai bhah ba 33 % ia ki kynthei ha Lok Sabha bad ki Iingdorbar Thaw Ain ki Jylla.
Kat kum ka khubor, bun ki Myntri ka BJP bad ki MP kila shah bthah ban wanrah ia ki constituency ba mihkhmat da ki kynthei sha Parliament ha ki sngi ban wan. U President ka BJP JP Nadda ula iakynduh ruh ia bun ngut ki Myntri bad MP ka Party ha ka sngi Nyngkong.
Women’s Reservation Bill: Ki mat kiba phi dei ban tip
1. Ka women’s reservation bill ka pynthikna ia ka bhah ba 33 percent ia ki kynthei ha Lok Sabha bad State Assembly
2. Shibynta na ka lai bynta ki seat bala buh bhah ia ki Scheduled Caste bad Schedule Tribe yn ai bhah noh sha ki Kynthei na kine ki kynhun.
3. Ia ka jingai bhah lah ban ai da kaba ia ai bujli sha ki constituency bapher bapher ha ka Jylla lane ki Union Territory.
4. Kane ka jingai bhah ia ki Kynthei kan kut noh 15 snem hadien ba pyntreikam ia kane ka Amendment Act.
Ia ka Women’s Reservation Bill la wanrah nyngkong ha u snem 1996 bad ka Rajya Sabha kala ai jingmynjur ha u bnai Lber 2010 hynrei kala iap noh hadien ba ka Lok Sabha kam shym la ai jingmynjur ia ka.
