Shillong, Nailur 19: Ka Sorkar Jylla kala kular ban siew ia ka bai lutksan sha ki nongri masi hadien ba palat 9000 tylli ki masi kila shah ktah ha ka jingpang Lumpy Skin Disease (LSD) ne jingpang snieh doh ha Jylla.
Haba jubab hapoh ka Iingdorbar hynne ka sngi Ba-ar, u Myntri ka Tnad Animal Husbandry and Veterinary Bah A.L Hek ula pyntip ba haduh mynta ka Sorkar kam pat ai satia ia kano kano ka song pisa ban iarap ia ki nongri masi namar ka jingwan lynshop ka LSD.
Hynrei haba u MLA ka VPP na Nongkrem Bah Ardent M Basaiawmoit ula pan jingtip la ka Sorkar ka don jingthmu ban ai bailutksan sha ki nongri Masi, kiba hap ban khang khyrdep ia ki farm namar ka LSD, u Bah Hek ula ong “Ka Sorkar kan sa siew ia ka bai lutksan (sha ki nongri masi)”.
Kat kum ka jingong jong u, palat 9000 tylli ki masi kila shah ktah ha ka jingpang LSD hapoh ka Jylla.
U Bahe Hek ula pyntip ruh ba 4 tylli ki hospital ka Veterinary bad 125 tylli ki Dispensary kila ai dawa ban injek ia ki masi ban iakhun ia kane ka jingpang.
Ha kawei pat ka liang, u Myntri u pyntip ba ka Sorkar kala ai bai lutksan ba kot T. 16,20,000 sha ki paid nongri jingri ha u snem 2020-2021 namar ka jingiap jong ki 540 tylli ki sniang na ka jingpang African Swine fever.
Haba u Bah Ardent ula kynnoh ba ka jingpang swine flu kala wan jia hadien ba ka Sorkar kala sdang sam ia ki khun sniang kiba wanrah na shabar ka Jylla, u Bah Hek ula ong “Ngim pat dei ka Jylla kaba lah ban pynmih hi ia ki khun sniang, kumta ngi hap ban shaniah na shabar ka Jylla”.
 ne jingpang snieh doh ha Jylla.){kind=link}