Shillong, Iaiong 30 : Ka Cabinet Committee on Economic Affairs ba khlieh da u Myntri Rangbah Duh Narendra Modi, kala ai jingmynjur ban pyntrei, sumar bad pyniaid ia ka surok Greenfield Corridor Highway Project ba 4-lane-ka ban sdang na Mawlyngkhung (marjan ka Shillong) ha Meghalaya sha Panchgram (marjan ka Silchar).
Ia kane ka project yn pyntreikam da ka Hybrid Annuity Mode, ha ka jingmang pisa ba kot T.22,864 klur.
Ka jingjrong jong kane ka project ka long haduh 144.80 km ha Meghalaya bad 22 km ha Assam.
Ka Greenfield Corridor kan pynkylluid ia ka leit ka wan ki kali hapdeng ka Guwahati bad Silchar, kan pynduna ia ka por ha ka leit ka wan bad kan pynjanai ruh ia ki lad pyniasoh sha kiwei ki Jylla kum ka Tripura, Mizoram, Manipur bad ka thain Barak Valley jong ka Assam.
Nalor ki jingmyntoi ha ka leit ka wan, ka project la khmih lynti ba kan kyntiew ia ki kam khaii pateng bad ka jingroi ki kam karkhana ha Meghalaya khamtam ha ki thain ba don ki karkhana pynmih dewiong bad ba pynmih dewiong, kaba ka surok ka iaid lynti.
Kan pynsuk ruh ia ka leit ka wan ki nongshangkai pyrthei na Ri bad nabar Ri kiba leit na Guwahati sha Shillong bad ka Silchar Airport, ka ban kyntiew ruh ia ki kam jngohkai ia ka sawdong sawkun jong ki jaka ha ka thain Shatei Lam Mihngi.
Kane ka Corridor kan iaid lyngba ki District bapher bapher kynthup ka Ri-Bhoi, East Khasi Hills, West Jaintia Hills bad East Jaintia Hills ha Meghalaya bad ka Cachar District ha Assam.
Kan iarap ruh ban pynkylla ia ka surok NH-06 bad kan iaid ryngkat bad ka PM Gati Shakti National Master Plan ban pyntrei ia ki jingtei kiba ai jingmyntoi bapher bapher.
Haba buh ban pyniasoh bad kiwei kiwei ki suroh bah-NH-27, NH-106, NH-206 bad NH-37, kane ka project kan pynthikna ia ki jingiasoh ba khlem don jingthut sha ki sor bad ki sorbar kynthup ka Guwahati, Shillong, Silchar, Diengpasoh, Ummulong, Phramer, Khliehriat, Ratacherra, Umkiang bad Kalain.
 ha Meghalaya sha Panchgram (marjan ka Silchar).){kind=link}