Shillong, Nailar 25 : Ka Sorkar Meghalaya Democratic Alliance –II, ha ka sngi Thohdieng, kala mynjur ban seng ia 2 tylli ki Medical College ka Sorkar bad kawei ka Medical College ba shimet hapoh ka Jylla – kawei ka Shillong, kawei ha Tura bad kawei ka Ri-Bhoi District.
Ia kane ka rai la shim ha ka jingialang jong ka Kynhun Myntri ba la pyniaid da u Myntri Rangbah ka Jylla Conrad K Sangma.
Haba iakren bad ki lad pathai khubor hadien ka jingialang, ka Myntri bad Nongaiktien ka Sorkar Kong Ampareen Lyngdoh kala pyntip ba ka Kynhun Myntri kala rai ia ka sienjam (roadmap) ban sdang noh wut wut ia ki kam ha kaban pynsdang ia ki 3 tylli ki Medical College hapoh ka Jylla.
“Ngin sa sdang noh wut wut ia ka kam. Ngi lah ban ioh ha kine ki 2-5 snem ban wan, kumba 140 seat na ka bynta ka Jylla Meghalaya ka ban nang kiew man u snem. Ngi phaikhmat ia ka thong ba 240 lane lehse 340 seat” kala bynrap.
Ia ka Shillong Medical College, ka Tnad ka Koit ka Khiah kala wad ia ki lad ki lynti ban pyndonkam da ki jingtei kiba la don lypa kum ka Civil Hospital, Shillong, Ganesh Das Hospital bad ruh ban pyndonkam ia ki Doktor kum ki Doktor Specialist bad kiwei kiba lahban long kum ki nonghikai.
U Principal Secretary ka Tnad ka Koit ka Khiah Sampath Kumar u pyntip “Ka tnad kala thung ia ka Committee halor kane ka kam (Shillong Medical College) bad lyngba kane ka committee ba kala mih ka jingtyrwa ban seng ia ka Shillong Medical College hapoh ki 2-3 snem ban wan. Ngin sdang shuwa da 50 seat ha Shillong bad katba dang iaid ka por, shisien ba ngi la don iala ki jong ki nonghikai, ngin sa nang kyntiew sa ha ka 100 seat”.
Ka Medical College ha Ri-Bhoi kan dei kaba tip kum ka PA Sangma International Medical College bad ia kane ka College la shimkhia ban sdang da ka University of Science and Technology, Meghalaya (USTM).
Ka USTM kala wanrah ia ka jingtyrwa kaban ai jingmyntoi ia baroh arliang mamla ha kaba kala tyrwa ban mang ia ki medical seat khlem ka jingsiew (free) bad ba duna dor (concession) ia ki samla pule jong ka Jylla bad kyrpad ruh ban iarap pisa lem lyngba ka ram ban sa siew pat, ia kaba la mynjur da ka Sorkar.
U Sampath Kumar u pyntip ba ka USTM kala kyrpad ban iarap pisa ha ka dur jong ka ram ban siew pat, kaba kot haduh T. 230 klur.
Ka Tura Medical College kala don lypa ha ka jingpyntrei bad ka Tnad ka Koit ka Khiah kan sa shim rai ia ka jingtreikam jong kane ka Medical College kynthup ia ki Nonghikai. Ka Sorkar kala phaikhmat ban pyniaid da ka PPP Model lyngba ka jingiateh lok bad ki Medical Institution ha kaban pyniaid ia kane ka Medical College.
Ha kajuh ka por, ka Kynhun Myntri kala mynjur ruh ban thaw ia ka Meghalaya Medical Services Recruitment Board (MMSRB) kum ka Tnad treikam ba shirt aka ban khmih ia ka bynta ha kaban thungkam ia ki doktor Allopathy, Ayush, Dental bad ki Nurse.
